FIER-Një administrator portali është dhunuar mbrëmjen e sotme në qendër të qytetit nga një efektiv policie. Rreth orës 20:00, efektivi në stacionin e policisë Roskovec Anxhelo Bardhi me një makinë tip 'Benz' me targa AA600M, teksa ishte jashtë shërbimit ishte vendosur në ndjekje duke i bërë pritë administratorit të portalit që po udhëtonte me një 'OPEL' me targa AA 683 EO së bashku me një vajzë.

Në momentin që administratori i portalit Xhoel Osmënaj po kalonte në mes të qytetit i ka bërë pritë duke e ndaluar. Efektivi zbriti nga makina dhe së bashku me shokun e tij që ndodhej në 'Benz' i është drejtuar 'OPEL'-it me një çekiç ku fillimisht ka thyer xhamin e parë më pas e kanë qëlluar me grushte dhe sende të forta.

Report Tv siguroi pamjet e momentit të dhunës, kur Bardhi me shokun e tij tentojnë të nxjerrin me forcë nga makina Osmënajn, ndërsa vajza që ishte në makinë me administratorin tenton që të tërheqë efektivin e policisë. Pas ndërhyrjes së patrullës është bërë shoqërimi i efektivit Anxhelo Bardhi në komisariatin e Policisë Fier dhe personave të tjerë të përfshirë në këtë ngjarje.

Polici i stacionit të Roskovecit që u përfshi dhe dhunoi qytetarin është pezulluar nga detyra me urdhër të drejtorit të përgjithshëm Ardi Veliu. Grupi hetimor në drejtimin e Prokurorisë së Fierit dhe SHÇBA-së, po kryen veprimet për zbardhjen e plotë të ngjarjes dhe arsyet. Ndërkohë, Drejtoria e Standardeve Profesionale në Policinë e Shtetit ka nisur hetimin disiplinor për shkelje të rëndë.