Dy persona kanë rënë në prangat e policisë së Tiranës për shitje të lëndëve narkotike në doza.

I arrestuari i parë, 30-vjeç u ndalua në rrugën “Mine Peza” teksa ishte duke lëvizur me makinë. Në banesën e tij blutë gjetën një sasi kokaine.

Ndërkohë në banesën e 19-vjeçarit blutë gjetën 256 gramë kanabis. Dyshohet se i riu do e shiste lëndën narkotike në Krujë.

“Në vijim të punës për parandalimin, evidentimin dhe goditjen e veprimtarisë kriminale të shitjes së lëndëve narkotike, shërbimet e Komisariatit të Policisë Nr. 3 dhe të Komisariatit të Policisë Krujë, në bashkëpunim me Seksionin për Hetimin e Narkotikëve të DVP Tiranë, goditën 2 raste të kësaj veprimtarie kriminale dhe arrestuan shtetasit:   - A. K., 30 vjeç, banues në Tiranë dhe A. M., 19 vjeç, banues në Krujë.  

-Shërbimet e Policisë kanë ndaluar në rrugën “Mine Peza”, automjetin që drejtonte 30-vjeçari, në të cilin, gjatë kontrollit, gjetën sasi të lëndës së dyshuar narkotike Kokainë. Në vijim, gjatë kontrollit në banesën ku ai jetonte me qira, u gjet sasi tjetër e lëndës së dyshuar narkotike Kokainë, që 30-vjeçari e posedonte më qëllim shitjen.   

-Shërbimet e Policisë, gjatë kontrollit në banesën e 19-vjeçarit, gjetën 256 gramë lëndë të dyshuar narkotike Cannabis Sativa, që dyshohet se ky shtetas e posedonte me qëllim shitjen në qytetin e Krujës”, njoftoi sot policia.    

Materialet procedurale iu referuan Prokurorisë, për veprën penale ”Prodhimi dhe shitja e narkotikëve”.

-------------------------------

Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë