Tjetërsimi i pronave në Shëngjin, Apeli i GJKKO lë në fuqi dënimin me 13 vite burg për Gjevi Ndokën

Gjykata e Apelit të Posaçëm ka lënë në fuqi vendimin e GJKKO-së që dënoi me 13 vjet burg shtetasin Gjevi Ndoka, vëllai i ish-deputetit të PS Arben Ndoka i akuzuar si pjesë e një grupi kriminal që ka kryer tjetërsimin e pronave në zonën e Ranës së Hedhun në Lezhë.

Gjykata e Apelit ka vendosur lënien në fuqi të vendimit nr. 207, datë 29.06.2022 për dënimin me 13 vjet burgim. Vepra penale është kryer sipas prokurorisë me tjetërsimin e sipërfaqeve të tokës që në total kapin vlerën e rreth 55 milionë eurove.

'Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtarja Miliana Muça, sot më datë 10.10.2022, shqyrtoi kërkesën e regjistruar me nr. 137 akti, datë 28.07.2022, mbi ankimin e paraqitur nga ankuesi Gj.N., ndaj vendimit nr. 207, datë 29.06.2022 të Gjykatës së Posaçme të Shkallës së Parë për Korrupsionin dhe Krimin e Organizuar që ka vendosur: “1.Bashkimin e dënimit penal të dhënë me vendimin nr. 09, datë 01.02.2021 të Gjykatës së Posaçme të Shkallës së Parë për Korrupsionin dhe Krimin e Organizuar lënë në fuqi me vendimin nr. 18, datë 05.07.2021 të Gjykatës së Posaçme të Apelit për Korrupsionin dhe Krimin e Organizuar me dënimin penal të caktuar me vendimin nr. 12, datë 03.02.2021 të Gjykatës së Posaçme të Shkallës së Parë për Korrupsionin dhe Krimin e Organizuar të ndryshuar me vendimin nr. 23, datë 15.04.2022 të Gjykatës së Posaçme të Apelit për Korrupsionin dhe Krimin e Organizuar, duke i caktuar të dënuarit Gj. (Xh.) N., i biri i {...} dhe {...}, i datëlindjes {...}, lindur në {...}, një dënim të vetëm prej 13 (trembëdhjetë) vjet burgim, vuajtja e të cilit të fillojë nga dita e arrestimit datë 21.10.2018 dhe të kryhet në një burg të sigurisë së lartë.” Sa më lart, Gjykata e Posaçme e Apelit për Korrupsionin dhe Krimin e Organizuar vendosi: Lënien në fuqi të vendimit nr. 207, datë 29.06.2022 të Gjykatës së Posaçme të Shkallës së Parë për Korrupsionin dhe Krimin e Organizuar.'- njofton GJKKO.

LEXO EDHE:
Ylli Pata: Si do të shpërndahen pasuritë e sekuestruara zyrtarëve të lartë?

Hetimet për tjetërsimin e pronave në bregdetin e Shëngjinit nisën në 2017 kur një qytetar denoncoi se toka e tij rezultonte në Hipoteke në emër të disa familjeve të tjera. Prokuroria zbuloi një sipërfaqe të madhe toke prej 234 mijë metrash katrorë tokë në zonën e Ranës së Hedhun që ishte përfituar përmes falsifikimit të dokumenteve.

Bashkia Lezhë dhe Këshilli i Qarkut Lezhë “nëpërmjet shkresave përkatëse zyrtare, pavarësisht se në realitet (tokat) janë mal dhe ranishte i kanë konfirmuar si toka të kategorisë “Arë” dhe “Pemtore”. Sipas vendimit për sekuestrim parcelat ishin regjistruar në emër të personave që nuk kishin të drejtë të përfitonin tokë në atë zonë.

M.Q./Shqiptarja.com

TAG:
• gjevi ndoka
• arben ndoka
• tjetërsimi i pronave
• GJKKO