Receta

Trahaniku i Përmetit, një nga byrekët më të shijshëm nga zonja Albana

Në këtë hapësirë të faqes tonë do të gjeni mënyrën e përgatitjes së recetave të gatimit të ideuara nga Zonja Albana. Këto receta Zonja Albana i gatuan çdo ditë në emisionin Rreze Dielli nga ora 09:00 – 10:00.

Redaksia 26 Tetor 2023, 12:16 | Përditesimi: 26 Tetor 2023, 12:18

Trahaniku i Përmetit

Përbërësit:

250 gr grurë të shtypur
1 kg qepë
2 lç piper i zi
2 lç rigon
2 lç spec djegës i kuq
100 gr gjalpë
100 ml vaj ulliri
2 gjokse pule
1 grusht arra të pjekura
500 gr miell
Petë të pjekura

Përgatitja:

LEXO EDHE:
Petulla me miell misri nga zonja Albana

Përgatisim brumin me pak ujë, miell, vaj ulliri dhe kripë dhe e mbulojmë me një copë të lagët. Ndërkohë ziejmë pulën me ujë dhe pak kripë. Presim qepët imët dhe i kaurdisim në zjarr të ngadaltë derisa të treten. Pasi pula ka zierë e ndajmë në fije fije dhe e shtojmë tek qepët. Në një tenxhere me ujë të vluar hedhim grurin e shtypur dhe e ziejmë derisa të zbutet. Shtojmë kripë dhe erëzat (piper, spec të kuq pluhur dhe rigon). Më pas pjekim arrat dhe i thërrmojmë. I shtojmë tek harxha e grurit dhe më pas e bashkojmë me qepën dhe mishin e pulës.

Hapim dy petë, mbi to shtrojmë petë të pjekura. Çdo rresht pete e lagim me lëngun e pulës të cilin e kemi pasuruar me pak vaj ulliri. Pas tre shtresa me petë të pjekura shtojmë mbushjen me grurë, qepë dhe mish. E mbulojmë harxhën me një shtresë petë të pjekura. Vijojmë ta lagim me lëng mishi dhe e përfundojmë shtresën e trahanikut me dy petë të njoma. Pasi e lyejmë sipërfaqen me vaj ulliri e vendosim trahanikun në furrë dhe e pjekim ngadalë për gati 30 minuta në temperaturën 180-200 gradë C.

MC/Shqiptarja.com

TAG: