Dhjetëra qytetarë së bashku me frat Ndue Toplanën, u mblodhën në Kishën e Shën Ndout në Laç për të kundërshtuar projektin e Provincës Françeskane për transformimin e kishës.

Me moton “Stop Groposjes së Besimit”, ata kërkuan ndalimin e punimeve, duke theksuar se ky vend po rrezikohet të shndërrohet në një ambient të ngjashëm me një varrezë.

“Këtu është bërë një projekt ku do të prishet krejt, krejt sheshi deri te parkingu, krejt çdo gjë duke përjashtu kishën e vogël. Edhe në fund poshtë kësaj, poshtë ku j tash do të bëhet kripta, vendi për lutje, edhe kripta gjithkush e di nëpër botë se është vend varresh. Edhe ne normalisht unë nuk kam qejf që shqiptarët përgjithësisht të vijnë në këtë kishë të hyjnë në varre për me u lut. E dua që të jemi një kishë sipër, sipër vendit, sipër sheshit”, tha prifti Ndue Toplana.

Sipas qytetarëve dhe përfaqësuesve të kishës, projekti aktual cenon identitetin dhe shenjtërinë e vendit.

“Për mua është një Vatikan i dytë. Dhe të bësh këtë lloj masakre, unë me të thënë të drejtën dua t'i kërkoj pak llogari Zotit si ka mundësi që i lë këta njerëz me bë këtë masakër”, një qytetarë.

“Duhet të bëhet një projekt i një kishe që të ketë lezet ta shohë populli e të thotë 'marshallah', jo të vish e të na futësh në tunel kur të vijmë me pa një meshë”, tha një tjetër.

“Unë jam kundër projektit se nuk jemi në kohën e pellazgëve me hy në tunel se po na luftojnë paganët”, tha një qytetar.

Më herët Provinca Françeskane ka hedhur poshtë këto pretendime, duke deklaruar se kisha ekzistuese nuk do të preket por do të ndërtohet një katedrale e re mbi tokë dhe një vend për lutje poshtë saj.