Tre penallti për Qarabag, Kukësi eliminohet me 3 gola nga Champions League

Kukësi është eliminuar në turin e dytë eliminator të Champions Leagues, pas humbjes 3-0 në Baku të Azerbajxhanit kundër skuadrës vendase të Qarabag.

Ndeshja e parë në Shkodër kishte përfunduar 0-0 dhe Kukësi po mbrohej mirë deri në minutën e 24-t të pjesës së parë, kur portieri Frashëri gabon, duke penguar një lojtar në zonën e rreptësisë.

Penallti për Qarabag, gjuan Quintana dhe 1-0 për azerët. Me të nisur pjesa e dytë, sërish penallti për vendasit. Alla prek topin me dorë, teksa topi po i drejtohej portës. Mbrojtësi i Kukësit merr karton të kuq.

Nga pika e bardhë kësaj radhe shfaqet Emeghara, që fitoi të dy penalltitë, por portiere Frashëri kësaj radhe tregohet vigjilent dhe pret, duke mbajtur disi në lojë të tijtë.

Megjithatë, nënkampionët e Shqipërisë gabojnë përsëri, kësaj here me Malikjin, që pengon përsëri Emegharan në zonë. Penalltia e tretë për Qarabag gjuhet sërish nga Quintana dhe në minutën e 57-të, 2-0 për vendasit.

Me 10 lojtarë në fushë, Kukësi e ka pasur të pamundur të shënojë qoftë edhe një gol, ndërsa rivali në fund shënon edhe golin e tretë.

Kukësi kalon në turin e tretë të Europa League dhe do të ndeshet me fituesin e çiftit Vikingur-Torpedo Kutaisi, ku me siguri do të sfidojë gjeorgjianët e Torpedos, pasi kanë fituar ndeshjen e parë 3-0.

Ndërsa Qarabag i Ansi Agollit (nuk u aktivizua sot) do të përballet në turin e tretë me BATE Borisov të Bjellorusisë, që mposhti kampionët e Finlandës, Helsinkin.

Rendit zhvillimet sipas orarit:

Të Fundit Të Parat

//Shqiptarja.com

TAG:
• champions league
• Qarabag