Treni serb, Topi: Beogradi ndikohet
nga Rusia, u provokua tension

Ish presidenti i Shqipërisë, Bamir Topi, në Info Magazine të Klan Kosovës, ka thënë se treni serb i veshur me simbole nacionaliste ishte provokim i radhës i Beogradit zyrtar për të tensionuar situatën në Kosovë.
 
Ai ka deklaruar se për bindjen e tij ky veprim duhet të jetë inspiruar nga Rusia, duke përmendur një deklaratë të ministrit të Jashtëm të këtij vendi, Sergej Lavrov.
 
“Ajo që ka ndodhur në vitin 2008 është ngjarja historike më e madhe që ka të bëjë më rikthimin e së drejtës së Kosovës për të qenë shtet i pavarur. Sipas meje ka një përpjekje të Beogradit për të krijuar tension në Kosovë, kjo nuk vjen nga çështje emotive, por nga një studim i gjatë që kam bërë. Kam bindjen të plotë se inspirimi vjen nga Rusia. Kam ndjekur ministrin e Jashtëm rus, Sergej Lavrov, sot por që nuk pati fjalët e një diplomati”, thotë Topi. 
 
Ish-kreu i shtetit shqiptar thekson se prej 2008-ës Kosova është sovrane dhe e pavarur dhe ka të drejtë të mbrojë kufijtë e saj. 

“17 shkurti i vitit 2008 riktheu te Kosova staturën absolute të një shteti sovran dhe të pavarur dhe sovraniteti lidhet me institucionet, politikën kufijtë, politikën parlamentare, qeveritare dhe diplomacinë. Politika serbe pavarësisht nga sjellja e “butë” mbetet politika e njëjtë që në background ka interesa të tipit nacionalist. Nuk mund të bëhem intepret i një pozicioni të disa politikanëve shqiptar. Çdo politikan është i rëndësishëm nominalisht. Por më me rëndësi është politika shqiptare”, ka thënë kryetari i FRD-së. 
 
Redaksia Online
l.q/Shqiptarja.com