Tritol në oborrin e një hoteli
pranë stadiumit "Elbasan Arena"

Një pako e dyshimtë është gjetur në një hotel pranë stadiumit "Elbasan Arena", në unazën jugore të qytetit të Elbasanit. Pakoja dyshohet të jetë eksploziv. Ajo është pikasur fillimisht nga kalimtarë të rastit të cilët kanë lajmëruar pronarin e hotelit. 

Forca të shumta policie kanë mbërritur në vendngjarje, ndërsa është bërë evakuimi i menjëhershëm i banorëve përreth zonës. Policia ka sekuestruar lëndën plasëse qw ndodhej brenda pakos. Sipas njoftimit të Policisë së Elbasanit, pas verifikimeve ka rezultuar se lënda plasëse ishte tritol në sasinë rreth 40 gr si dhe disa copa fitili të djegur. 

Dyshohet se lënda është hedhur për të trembur pronarët e hotelit. Policia ka sekuestruar kamerat e hotelit por edhe të bizneseve përreth për të hedhur dritë mbi autorët e kësaj ngjarje. Hoteli ndodhet pranë rrugës, çka edhe ka favorizuar autorët që të largohen menjëherë pas hedhjes së pakos me eksploziv.

Ndërkohë është marrë në pyetje edhe pronari i hotelit, V.N,  65  vjeç, banues në qytetin e Elbasanit, për të hedhur dritë nëse ka patur ndonjë konflikt. Në ambientet e policisë janë shoqëruar edhe disa dëshmitarë në vendngjarje për t'i marrë në pyetje.


(Hoteli pranë të cilit u gjet pakoja)

Njoftimi i Policisë së Elbasanit:
"Njoftohemi se sot më datë 29.05.2016, në  Lagjen “Çlirimi”,  në Unazën  Jugore të qytetit, në afërsi të një  hoteli,  në  pronësi  të  shtetasit  V.N,  65  vjeç,  banues  në  Elbasan,  është gjetur një sasi e vogël lënde plasëse e dyshuar  si tritol rreth  30 – 40 gr  si  dhe  disa  copa  fitili  të  djegur.
 
Efektivat e policisë, kanë mbërritur menjëherë në vendngjarje dhe kanë bërë sekuestrimin e lëndës plasëse në cilësinë e provës materiale.
 
Specialistët  për  Krimet  e  Rënda  në  Drejtorinë  Vendore  të  Policisë  Elbasan,  po  punojnë  për  identifikimin  dhe  kapjen  e  autorit/ve".

Redaksia Online
l.q/Shqiptarja.com