Ukraina po përjeton një krizë demografike të përshpejtuar, me popullsinë që ka rënë nga 42 milionë para pushtimit rus të vitit 2022, në më pak se 36 milionë aktualisht.

Demografët paralajmërojnë se vendi mund të bjerë deri në 25 milionë banorë deri në vitin 2051, një rënie e thellë që rrezikon të ardhmen ekonomike dhe sigurinë kombëtare.

Rënia e lindshmërisë është dramatike, ndërsa vdekjet tashmë tejkalojnë lindjet me raport tre me një.

Jetëgjatësia e meshkujve ka pësuar një goditje të rëndë, duke rënë në vetëm 57.3 vjet, një nivel i paprecedentë për një vend evropian. Ndërkohë, miliona qytetarë kanë ikur jashtë, dhe qindra mijëra të tjerë janë vrarë ose plagosur, duke lënë pas shkolla, spitale dhe komunitete të tëra pothuajse boshe.

Qeveria ukrainase parashikon një mungesë të afërt prej 4.5 milionë punëtorësh, çka rrezikon rindërtimin pas luftës si dhe kapacitetet mbrojtëse në periudhën afatgjatë.