Nëntëmujori i këtij viti është mbyllur me ulje të borxhit publik, në shifra historike. Raporti i fundit i Ministrisë së Financave tregon se në fund të shtatorit borxhi publik ishte sa 53.4% e Prodhimit të Brendshëm Bruto, në rënie krahasuar me 54.2% që rezultoi vjet.

BORXHI PUBLIK NË % NË RAPORT ME PBB
Viti 2022               64.12%
Viti 2023               57.64%
Viti 2024               54.21%
Shtator 2025         53.45%

Borxhi publik raportohet në rënie si përqindje në raport me PBB-në, pasi është rritur prodhimi kombëtar. Por përkthyer në vlerë borxhi i vendit përllogaritet në 14 miliardë euro, dhe këtu, shënon rritje me 510 milionë euro krahasuar me të njëjtën periudhë të vitit 2024. Rritja e borxhit në vlerë është ndikuar më së shumti nga marrja e eurobondit 650 milionë euro në fillim të këtij viti.

BORXHI PUBLIK I SHQIPËRISË
Korrik-Shtator 2024      13.497 mln euro
Korrik-Shtator 2025      14.007 mln euro
Diferenca                        +510 mln euro

Por, borxhi do të ishte edhe më i lartë nëse monedha kombëtare nuk do të ishte forcuar. Zhvlerësimi i valutave dhe kryesisht i euros e ka bërë më të lirë borxhin e huaj, për shkak se këstet e shlyerjes së tij kanë qenë më të ulta.

Ministria e Financave thotë në relacionin e rishikimit të buxhetit 2025, se vetëm nga zhvlerësimi i valutave, janë kursyer 107 milionë euro, interesa e ripagesa të borxhit që janë marrë në monedhë të huaj.

Borxhi publik i Shqipërisë është i përqendruar kryesisht për mbështetje buxhetore, për sektorin e transportit, energjisë elektrike dhe për ujësjellës kanalizime.