Katër ditë pas tubimit të opozitës, policia ka ndaluar një tjetër protestues, i cili urinoi tek dera e selisë së qeverisë pasditen e së shtunës. Ai është Florian Marku nga Shkodra. Pas ndalimit, nesër do të dalë para gjykatës.

Ditën e protestës pasi simpatizantët çanë kordonin e policisë tek Kryeministria, Marku u filmua nga kamerat teksa urinonte tek dera e godinës. Edhe pse mbi kokë mbante një kapuç, shkodrani është identifikuar katër ditë pas tubimit duke u ndaluar nga policia.

Pas protestës së 13 prillit, policia fillimisht arrestoi 37 protestues, për shkak të incidenteve që u shënuan gjatë tubimit, ku ndër të tjera iu vu flaka edhe një automjeti dhe u ça për disa herë kordoni i policisë.

Por në burg janë lënë Edmond Bushi, Daniel Gjata dhe Armando Gjecaj personi me maske, i cili u pikas nga kamerat në disa nga momentet e dhunës që u shënuan si para Kryeministrisë, ashtu edhe para Parlamentit.

Ndërkohë masa 'arrest shtëpie' është caktuar ndaj Gëzim Almetës dhe Shemshi Koloshit. Pjesa tjetër e të shoqëruarve janë liruar.