Dy ushtarakë shqiptarë kanë triumfuar në garën “Best Warrior” të Gardës Kombëtare të Ushtrisë së Nju Xhersit për vitin 2026.

Lajmi është bërë i ditur nga Ambasada e Shteteve të Bashkuara të Amerikës e cila njoftoi të mërkurën se Marjus Cauli dhe Hambel Peçi morën pjesë në garën elitare ushtarake dhe fituan në kategoritë e tyre përkatëse.

Sipas ambasadës amerikane, gjatë katër ditëve tepër sfiduese, pjesëmarrësit në garë u testuan në kurse me pengesa, prova të aftësisë fizike, aftësi luftarake në ujë, orientim në terren dhe ushtrime të qitjes me sisteme të ndryshme armësh.

Aktiviteti u zhvillua në kuadër të 25-vjetorit të Programit të Partneritetit Shtetëror mes Gardës Kombëtare të Nju Xhersit dhe Forcat e Armatosura të Shqipërisë. Në një postim në rrjete sociale, Ambasada Amerikane e cilësoi fitoren e ushtarakëve shqiptarë si një dëshmi të forcës dhe suksesit të partneritetit mes dy vendeve.