Mbretëresha Elizabeth II ndërron jetë, reagon politika shqiptare! Rama: Lamtumirë! Begaj: Do mbahet mend me admirim! Meta: Humbje e madhe

Deputeti socialist, Lavdrim Krashi, në një intervistë për Report Tv, ka treguar se si e ka njohur ai mbretëreshën Elisabeth, kjo për shkak se 27 vite të jetës së tij i ka kaluar në Angli si emigrant.

“Unë kam jetuar 27 vite dhe e kam njohur përmes fjalimeve të saj përshëndetëse për Krishtlindje dhe në raste të tjera në hapjen e sesioneve parlamentare dhe përshkrimit në vija të përgjithshme sa herë që ndërroheshin qeveritë”, tha Krashi.

Ai e ka cilësuar mbretëreshën si simbol të shërbëtorit publik.

“Figura e mbretëreshës është një grua që personifikon bashkimin e popullit britanik, sigurinë e shërbëtorit publik për 70 vite të mbretërimit të saj, është një nga monarkët me jetëgjatësinë më të madhe”, tha ai.

Sali Berisha, i shpallur non grata nga Britania e Madhe, ka reaguar për ndarjen nga jeta të mbretëreshës Elisabeth II. Berisha ka kujtuar kohën kur është pritur nga mbretëresha në pallatin Buckingham në kohën kur ai ishte kryeministër i Shqipërisë. Ai i ka shprehur ngushëllimet familjes mbretërore, ndërsa shkruan se mbretëresha solli stabilitet e prosperitet për vendin e kombin e saj.

“Dielli nuk lind më për Mbretëreshën Elizabeth e II. Të dashur miq, Elizabeth e II, Monarkja që mbretëroi më gjatë se kushdo në historinë mbretërore të Britanisë së Madhe, plot 70 vjet, ku udhëhoqi me ndere, përkushtim e dinjitet e solli mbi të gjitha stabilitet e prosperitet për vendin e kombin e saj, mbylli sytë përgjithmonë duke lënë pas një trashëgimi të jashtëzakonshme vlerash mbretërore e njerëzore, një devotshmëri e integritet të pashoq që do të mbahet mend në kohëra.

Mbretëresha Elizabeth e II ishte personaliteti më i shquar dhe më i dashur e cila me virtytet, mençurinë dhe devocion 70-vjeçar në shërbim të kombit, mbretërisë të saj dhe paqes në botë u shndërrua në një nga personalitetet më të respektuara dhe më fisnike e të dashura të kohës.

Unë kam patur rastin të pritem në Pallatin e Buckingham në audiencë të veçantë nga Madhëria e saj si president i Shqipërisë. Mbeten të paharruara për mua vlerësimi i saj për përmbysjen e diktaturës staliniste në Shqipëri dhe përpjekjet e shqiptarëve për ndërtimin e demokracisë. Në vitet e mëvonshme përsëri jam takuar në pritje ceremoniale të shtruara nga Madhëria e saj.

Duke shprehur vlerësimin tim më të lartë dhe nderimin tim më të thellë për këtë Zonjë të madhe të nderuar në mbarë botën shpreh ngushëllimet e mia më të ndjera Madhërisë së tij Mbretit Charles, familjes mbretërore dhe subjekteve të Madhërisë saj dhe lutem që shpirti i saj i madh të gjejë paqen e amshuar. Amin”, shkruan Berisha.

Kryetari i Bashkisë së Hasit, Liman Morina ka pasur një reagim për humbjen e mbretëreshës Elizabeth.

Në emër të Bashkisë Has, të qytetarëve por edhe vajzave, djemve e familjeve hasjane që jetojnë e punojnë në Mbretërinë e Bashkuar, shprehim ngushëllimet më të ndjera për ndarjen nga jeta të Madhërisë së Sajë, Mbretëreshës Elisabeth II. E ndjejmë obligim të ndajmë dhimbjen me familjen mbretërore dhe qytetarët e MB për këtë humbje të madhe.Prej vitesh qytetarët e Hasit ndërtuan ura komunikimi me Britaninë e Madhe, gjetēn strehë e ndërtuan jetën e të ardhmen. U betuan para Madhërisë së Sajë e cila u besoi shtetësinë e Kurorës, për të qenë qytetarë të denjë e kontribuues vlerash në atë tokë e cila u kthye në atdheun e dytë për ta. Ne përulemi para veprës të Elisabeth II, e cila ka zënë një vend të veçantë më zemrën e çdo hasjani. Faleminderit Mbretëreshë. U prehsh në paqe. Mbetesh e paharruar për ne”, shkruan ai.

Hasi dhe Anglia kanë një lidhje të madhe. Kjo pasi një pjesë e konsiderueshme e të rinjve kanë zgjedhur që të emigrojnë drejt Anglisë, e ndërsa disa javë më parë, ai ka bërë me dije se në sheshin e qytetit të Hasit do të vendoset një monument i Mbretëreshës Elisabeth të Anglisë.

Princ Leka ka reaguar për ndarjen nga jeta të mbretëreshës Elisabeth II. Ai ka postuar një foto të mbretëreshës kur dekoron Nënë Terezën me ‘Order of Merit’. Leka shkruan se mbretëresha Elisabeth do të mbetet një mentor për këdo aspiron t’i shërbejë interesit kombëtar.

“Madhëria e Saj, Mbretëresha Elizabeth II, prehet sot në paqe pas më shumë se 70 vitesh në shërbim ekskluziv të shtetit, të popullit britanik dhe të 14 kombeve të Commonëealth anembanë rruzullit që e njihnin për sovranen e tyre. Dëshmi e gjallë e mishërimit të sovranitetit kombëtar në aspektin e vet më përbashkues, Elizabeth II përfaqëson mesazhin e pakohshëm të vazhdimësisë së shtetit, të Kurorës, që qëndron i palëkundur me përkushtim dhe vetëdije përballë sfidës dhe pasigurive. E lidhur prej gjakut, ndonëse prej së largu, me Mbretëreshën Geraldinë, ajo do te mbetet një mentor për këdo aspiron t’i shërbejë interesit kombëtar, kudo ku ndodhet, dhe madhështisë së shtetit që është streha dhe mburoja e shoqërisë. Më pëlqen që këtë homazh ta shoqëroj me fotografinë e çastit intim kur Mbretëresha dekoroi shqiptaren e madhe Nënë Terezën me Order of Merit, në vitin 1983. Zoti e pranoftë në mëshirën e tij dhe i priftë mbarë Madhërisë së Tij Britanike, Mbretit Charles III”, shkruan Princ Leka.

Presidenti Bajram Begaj ka reaguar pas ndarjes nga jeta të mbretëreshës Elisabeth II. Begaj shkruan se Elisabeth ishte një mbretëreshë me zemër të madhe që do mbahet mend me admirim.

“Ngushëllime të ndjera Familjes Mbretërore, popullit të Mbretërisë së Bashkuar dhe Komonuellthit për ndarjen nga jeta të Mbretëreshës Elizabet II. Ajo ishte një mbretëreshë me zemër të madhe, forcë e kuraje te jashtëzakonshme dhe do të kujtohet gjithnjë me respekt dhe admirim”, shkruan Begaj.

Kreu i Grupit Parlamentar të Partisë Demokratike, Enkelejd Alibeaj ka dhënë një mesazh ngushëllimi për ndarjen nga jeta të mbretëreshës Elisabeth II.

"Ngushëllimet e mia më të thella për ndarjen nga jeta të Mbretëreshës Elizabeth II. Një grua e admirueshme, një jetë në shërbim të qytetarëve, personifikimi unik i demokracisë britanike.  Mbretëresha më jetëgjatë në historinë e Britanisë do të mbahet mend për një kohë të gjatë si gruaja që mishëroi qetësinë dhe stabilitetin në një botë të trazuar me shumë sfida. U prefsh ne paqe", shkruan Alibeaj. 

Kreu i Partisë së Lirisë, Ilir Meta ka reaguar pas ndarjes nga jeta të mbretëreshës Elisabeth II. Meta thotë se është i trishtuar ndërsa shkruan se mbretëresha është e admiruar në mbarë botën për lidershipin frymëzues.

“Thellësisht i trishtuar për ndarjen nga jeta të Madhërisë së Saj, Elizabeth II, e admiruar në mbarë botën për lidershipin frymëzues, përkushtimin dhe angazhimin e saj të pathyeshëm! Duke vlerësuar lart kontributin e Saj të jashtëzakonshëm për forcimin e gjithanshëm të marrëdhënieve të shkëlqyera midis Republikës së Shqipërisë dhe Mbretërisë së Bashkuar, jam i bindur se figura dhe Udhëheqja e Saj e dalluar publike dhe ndërkombëtare do të kujtohet përherë me respektin më të thellë. Ngushëllimet më të sinqerta për Familjen Mbretërore, Qeverinë dhe popullin britanik, si dhe të gjithë Komonuelthin për këtë humbje të madhe”, shkruan Meta.

Kryetarja e Kuvendit,  Lindita Nikolla, mesazh ngushëllimi për ndarjen nga jeta të Mbretëreshës Elisabeta II.

“Ndarja nga jeta e Madhërisë së Saj, Mbretëreshës Elisabeta II, është një lajm i trishtuar jo vetëm për popullin e Mbretërisë së Bashkuar, por për gjithë njerëzimin. Një jetë e tërë në shërbim të kombit, të shtetit dhe qytetarëve!

Mbretëresha Elisabeta II, përbashkuesja e kombit, e pranuar gjerësisht si simbol i stabilitetit të Mbretërisë së Bashkuar dhe botës, e  ndihmoi vendin e saj në ndryshimet e mëdha përgjatë shtatë dekadave, për forcimin e identitetit kombëtar,  rritjen e ndikimit gjeopolitik dhe të pozitës ndërkombëtare.

Pushofshi në paqe, Madhëria Juaj!”, shkruan Kryetarja e Kuvendit, znj. Lindita Nikolla.

Kryeministri Edi Rama ka reaguar për ndarjen nga jeta e mbretëreshës Elizabeth.

“Lamtmurië mbretëreshë”, shkruan Rama.

Ministrja për Evropën dhe Punët e Jashtme ka reaguar mbi vdekjen e mbretëreshës Elizabeth II.

Me dhimbje të madhe dëgjuam lajmin për ndarjen nga jeta e # Mbretëresha Elizabeth. Gjatë mbretërimit të saj 70 vjeçar ajo dha udhëzime, motivim, vizion dhe stabilitet për Britaninë, një figurë respekti dhe admirimi për pjesën tjetër të botës . Ne ofrojmë @Familja mbretërore dhe njerëzve të saj  ngushëllimeve tona të përzemërta.- shkroi Xhaçka