Veliaj i dhuron “Kullën e Sahatit” kryebashkiakut të Splitit: Marrëdhënie të shkëlqyer

Veliaj i dhuron “Kullën e Sahatit” kryebashkiakut të Splitit: Marrëdhënie të shkëlqyer

Tirana dhe Spliti i Kroacisë nisin një bashkëpunim të ri mes tyre, për shërbime më të mira për qytetarët. Kreu i Bashkisë së Tiranës, Erion Veliaj priti në takim homologun e Splitit, Andro Krstulović Opara, me të cilin bisedoi mbi shtimin e marrëdhënieve mes dy qyteteve dhe shkëmbimin e eksperiencave më të mira. Kryebashkiaku Veliaj tha se është e nevojshme që marrëdhëniet e shkëlqyera mes dy kombeve dhe qeverive qendrore, të shoqërohen edhe me një bashkëpunim konkret mes dy qyteteve.

“Është një kënaqësi shumë e veçantë sot që kam mikun tim, kryetarin e Bashkisë së Split-it, i cili viziton Tiranën. Para disa muajsh kishim këtu presidenten e Kroacisë, me të cilën diskutuam se ka ardhur nevoja që, ashtu siç jemi bashkë në qeverinë qendrore, të jemi bashkë edhe në qeverinë lokale. Kemi shumë për të mësuar nga Spliti, një qytet i cili ka qenë epiqendra e tregtisë, e forcës detare, sot epiqendër e turizmit. Jam i lumtur që edhe Spliti ka disa gjëra për të mësuar nga Tirana, kur vjen puna te mbjellja e pemëve, te një qytet i qëndrueshëm”, tha Veliaj.

Kryetari i Bashkisë së Splitit, Andro Krstulović Opara falenderoi kryebashkiakun e Tiranës për mikpritjen dhe theksoi se të dyja bashkitë kanë mundësi të përfitojnë nga eksperienca më të mira për projektet që ato kanë zbatuar. Ai vlerësoi në mënyrë të veçantë zhvillimin që ka pësuar Tirana, duke u shndërruar në një qytet të gjallë dhe plot jetë. “Shoh një qytet të gjallë, me njerëz që punojnë, që janë aktivë, që nuk humbasin kohë, dhe një qytet plot jetë”, tha ai.

Veliaj shtoi se bashkëpunimi në nivel lokal është i domosdoshëm për t’u përkthyer në punë konkrete dhe lehtësira për qytetarët. “Edhe pse jemi dy qytete me përmasa të ndryshme, kemi shumë gjëra që na bashkojnë. Ndaj është e nevojshme që sot qytetet të jenë më afër, me rrugë dhe me infrastrukturë. Të shkosh në Split apo në Tiranë, pra në një qytet të Kroacisë, Bosnjës apo të Sllovenisë, ndonjëherë është më larg sesa të shkosh në një kontinent tjetër. Për të gjitha këto arsye kemi vendosur të bashkëpunojmë dhe të shtyjmë të dy qeveritë tona që ta bëjnë më të lehtë marrëdhënien mes nesh në rajon, teksa kërkojmë të integrohemi në BE”, deklaroi ai.

Nga ana e tij, kryebashkiaku i Splitit theksoi nevojën për bashkëpunim konkret mes të gjitha vendeve që lagen nga Adriatiku, për të krijuar infrastrukturën e përshtatshme që njerëzit dhe mallrat të lëvizin më lirshëm. “Jemi nisur nga Spliti me makinë, ishin 10 orë udhëtim, por gjithashtu ishin 10 orë të këndshme. Mjafton të themi se kemi një distancë prej vetëm 500 kilometrash, por mungojnë rrugët, pra infrastruktura. E rëndësishme është që kryebashkiakët përgjatë bregut të Adriatikut, bashkë me qeveritë qendrore, të bëjnë një hap përpara për më shumë impenjim për të lidhur vendet dhe qytetet tona. Kjo është e rëndësishme edhe për integrimin e Shqipërisë në vendin ku duhet të jetë, në Bashkimin Europian”, tha Opara.

Ndërkaq, ai siguroi se Kroacia do të jetë një avokate e Shqipërisë dhe Maqedonisë në samitin e Zagrebit, që do të mbahet vitin e ardhshëm, për çeljen përfundimtare të negociatave. “Në Samitin e ardhshëm të Zagrebit, gjatë presidencës së Kroacisë të Bashkimin Europian, do të vendosim në rend të parë integrimin e Shqipërisë dhe Maqedonisë së Veriut në BE, aty ku duhet të jeni. Në Kroaci do të gjeni miq, ashtu siç kemi qenë gjithmonë. Do të flasim edhe për bashkëpunimin mes qyteteve. Ne jemi pjesë e qyteteve të vendeve në zhvillim, dhe kemi një rol të rëndësishëm për popullsinë lokale. Me kryebashkiakun e Tiranës folëm edhe për aksionin e tij për të bërë më shumë për mbjelljen e pemëve në qytete. Të njëjtat probleme që duam të zgjidhim edhe ne. Kemi dëgjuar shumë ide të mira dhe të jeni të sigurt se në Split do të ndjekim përvojën tuaj”, tha Andro Krstulović Opara.

Në shenjë të vazhdimësisë së miqësisë mes qytetit të Splitit dhe qytetit të Tiranës, dy kryebashkiakët mbollën edhe një pemë në Parkun Europa.

Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Sondazhi i ditës:

    Si do jenë ndryshimet në Kodin Zgjedhor që do bëjnë PS-Rithemelimi?



×

Lajmi i fundit

Një shesh në Tiranë do të mbajë emrin e Dr. Florit, ja ku ndodhet

Një shesh në Tiranë do të mbajë emrin e Dr. Florit, ja ku ndodhet