Pas emergjencës së zjarreve të verës së 2025-ës, vendi po përballet me dëme të mëdha këtë fillim viti nga përmbytjet. Për t’ju përgjigjur emergjencave këtë vit fondet në dispozicion të institucioneve janë më shumë. Në buxhet janë parashikuar 10.5 miliardë lekë për të menaxhuar përmbytjet dhe për të garantuar mbrojtjen e infrastrukturës së kullimit.

Në buxhet janë parashikuar 5.7 miliardë lekë për Emergjencat Civile strukturë e Ministrisë së Mbrojtjes, e cila përgjigjet për pasojat nga fenomenet natyrore, përmbytjet, zjarret apo tërmetet. Në raport me vitin 2025, fondet janë në rritje me rreth 1.7 miliardë lekë.

BUXHETI I EMERGJENCAVE CIVILE
Viti 2025        3,994,002 mijë lekë
Viti 2026        5,791,250 mijë lekë
Rritja            +1,797,248 mijë lekë

Veç këtyre fondeve Ministria e Bujqësisë ka fonde të dedikuara për Menaxhimin e infrastrukturës së kullimit dhe ujitjes, që shkojnë për investime në kanalet kulluese apo ujitëse si dhe në hidrovore kryesisht në aspektin bujqësor. Janë 3.6 miliardë lekë për këtë qëllim në buxhet, teksa paratë në dispozicion vitin e kaluar ishin 3.4 miliardë lekë.

BUXHETI I MBZHR, PËR UJITJEN-KULLIMIN
Viti 2025   3,428,521 mijë lekë
Viti 2026   3,641,576 mijë lekë
Rritja         +213,055 mijë lekë

Gjithashtu vetë bashkitë kanë fonde të dedikuara për ujitjen dhe kullimin që i marrin si transfertë nga buxheti i shtetit, që për këtë vit janë pak më shumë se 1.6 miliardë lekë, me rritje të lehtë në raport me vjet.

BUXHETI I BASHKIVE PËR UJITJEN-KULLIMIN

Viti 2025          1,078,729 mijë lekë

Viti 2026          1,165,587 mijë lekë

Rritja                  +86,858 mijë lekë

 

Bashkitë me buxhetin më të madh në dispozicion për ‘ujitjen dhe kullimin’ janë kryesisht ato bujqësore. Kryeson Fieri me 75.9 milionë lekë, ndjekur nga bashkia Lushnje me 61.9 milionë lekë dhe Korça me 59.6 milionë lekë. Korça është edhe një nga bashkitë më të prekura nga përmbytjet e këtyre ditëve.

Kurse bashkia më e dëmtuar nga përmbytjet deri më tani, Durrësi ka si transfertë për këtë vit 58.1 milionë lekë. Ndërsa Lezha, Kurbini, Pogradeci apo Gjirokastra që gjithashtu po përballen me dëme të konsiderueshme marrin si transfertë për ‘ujitjen dhe kullimin’ shuma më pak se 29 milionë lekë.

FONDET E BASHKIVE/UJITJA DHE KULLIMI
Fier                75,961 mijë lekë
Lushnje          61,936 mijë lekë
Korçë             59,678 mijë lekë
Durrës            58,171 mijë lekë
Maliq             52,027 mijë lekë
Vlorë              50,883 mijë lekë
Divjakë          38,563 mijë lekë
Shkodër         36,552 mijë lekë
Lezha             29,857 mijë lekë
Kurbin           26,472 mijë lekë
Pogradec       13,425 mijë lekë
Gjirokastër    12,126 mijë lekë