Vetëplagoset  vëllai i avokates së
Berishës, Ballanca nën hetim

TIRANE - I vetëplagosuri aksidentalisht të djelën në mbrëmje në Tiranë, në rrugën “Mihal Grameno”, është vëllai i avokates së kryeministrit Berisha. Bëhet fjalë për Ermal Ballancën, 38 vjeç. Burime nga policia e kryeqytetit kanë njoftuar, se ai ndodhet në gjëndje të rëndë në Spitalin Ushtarak, ndërkohë që policia ka nisur procedimin për “armëmbajtje penale”.

“Me datë 13.05.2013, ora 03.45 filloi proçedimi penal në gjëndje të lirë për Ermal Faik Ballanca, i datelindjes 15.10.1975, lindur dhe banues në Tirane, me arsim të mesëm, i padënuar, sepse me datë 12.05.2013 në orën 22.00, në rrugën ‘Mihal Grameno’, është vetëplagosur me një armë pa leje, tip pistoletë me (mulli) me nr.IE 149990. Ai është dërguar në Qendrën Spitalore të Ushtrisë dhe ndodhet në gjendje te rëndë shëndetësore.

Pistoleta e sekuestruar do t’i dërgohet laboratorit kriminalistik për ekzaminime të mëtejshme”, thuhet në një njoftim të policisë. Ermal Ballanca, babai i dy fëmijëve, është vëllai i Erinda Ballancës. Kjo e fundit, është mjaft e njohur, pasi është avokatja e kryeministrit dhe kryetarit të PD-së, Sali Berisha.

38-vjeçari Erlmal Ballanca është vetëplagosur mbrëmjen e djeshme në ambientet e një lokali, në rrugën “Mihal Grameno” në Tiranë, teksa pastronte armën e tij, pistoletë.

I riu është person i njohur për uniformat blu të kryeqytetit, pasi vetëm pak kohë më parë, ka qenë i dyshuar kryesorë për vjedhjen e banesës të së motrës, Erinda Ballanca. Dje në mbrëmje, pas marrjes së ndihmës mjekësore, Ermali ndodhet jashtë rrezikut për jetën, ndërsa pritet që të përballet dhe me akuzën e armbajties pa leje.

Mbrëmjen e djeshme, forcat e policisë të komisarit, nr. 1, kanë bërë kontrollin e ambientit, por nuk kanë gjetur armë tjetër e pas marrjes së dëshmive, ka rezultuar nga hetimet paraprake, se ngjarja ka qenë aksidentale.

Shkrimi u botua sot në gazetën Shqiptarja.com (print) 14.05.2013

Redaksia Online
(b.m/shqiptarja.com)

TAG:
• erinda ballanca