Vlorë, sherri për kullotat, pranga
të dënuarit për vrasjen e 2007-s

VLORË - Prej 7 vitesh ishte në kërkim, vihet në pranga autori i një vrasjeje të ndodhur në vitin 2007 për çështje pronësie.
 
Policia e Vlorës ka bërë të ditur se, gjatë operacionit policor të koduar “Antena” ka vënë në pranga Viktor Omerin, 45 vjeç, lindur dhe banues në Vlorë në lagjen “11 Janari”.
 
Omeri është dënuar pasi në vitin 2007, në kodrat e fshatit Bestrovës për motive pronësie mbi disa kullota ka vrarë me armë zjarri Kleo Gërdhuqi.
 
45-vjeçari mësohet se prej vitit 2009, ishte i dënuar me 18 vite burg për akuzat e “vrasjes me paramendim e kryer në bashkëpunim” dhe “armëmbajtje pa leje.
 
VRASJA NDODHI PËR SHKAK TË HYRJES SË BAGËTIVE NË KULLOTA
Viktor Omeri bashkë me një person tjetër, kishte bashkëpronësi një tufë bagëtish dhe për ruajtjen e bagëtive të tyre ata kishin punësuar një. Ngjitur me këtë kullotë ndodhej edhe një stan dhe kullota e Kleo Gërdhuqi.
 
Por në datën 9 gusht 2007, në afërsi të stanit, në vendin e quajtur “Moçale” në fshatin Bestrov të Vlorës, rreth orës 08:30 është vrarë me armë zjarri Kleo Gerdhuqi.
 
Ditën e ngjarjes vëllai i viktimës e kishte parë në rrugën kryesore bagëtitë e vëllait të tij, viktimës Kleo Gërdhuqi të pa shoqëruara, kjo ka qene arsyeja që ai ka shkuar drejt vendit ku rrinte ai, duke e gjetur të vrarë në afërsi të stanit të tij.
 
Gjatë hetimi është mësuar se, në trupin e viktimës Kleo Gërdhuqi janë konstatuar tetë plagë me armë zjarri, plagë këto të shkaktuara në kokë, kraharor, bark dhe në gjymtyrë, të cilat kanë sjellë shokun hemoragjik, e më pas vdekjen.
 
Policia gjatë marrjes së dëshmive kishte zbuluar se viktima kishte pasur konflikt të mëparshëm me të dënuarin Viktor Omeri, kjo për shkak të kalimit të bagëtive në kullotën e tij. Këto debate midis tyre për këtë problem kishin ndodhur disa ditë para se të kryhej vrasja e Kleo Gërdhuqi.

Redaksia online
(ac/shqiptarja.com)