TIRANE-Dy autorët Altin Ndoci dhe Klevis Alla që vranë katër të rinjtë në Durrës në mars dhe prill vëllezërit Haxhia për prishjen e pazareve të drogës dyshohet se mund të jenë të përfshirë në grabitjen e blindave me para në aeroportin e Riasit në 9 prill të vitit të kaluar.

Gazetari i Shqiptarja.com Elton Qyno raporton se prokuroria e Durrësit po kryen verifikime mbi të gjitha deklarimet e 22-vjeçarit të penduar, mes të cilave edhe për grabitjen, por e gjitha është në kuadrin e dyshimeve. Kjo dosje hetohet nga SPAK, por lidhur me dyshimet e fundit që janë ngritur, gazetari i Report Tv Arsen Rusta raporton se nuk ka asnjë material referuar nga prokuroria e Durrësit.

"Hetimet janë edhe për ngjarje të tjera, flitet se mund të kenë një lidhje edhe me grabitjen e Rinasit, por SPKA, që heton këtë dosje ende nuk konfirmon që të ketë marrë në hetim këtë pjesë, ndërsa nga prokuroria e Durrësit nuk ka mbërritur asnjë material referues për dyshimet se këta shtetas apo bashkëpunëtorë të tyre kanë qenë të përfshirë në grabitjen e Rinasit" tha gazetari i Report Tv Arsen Rusta.

Ndërkohë që gazetari i Report Tv në Durrës, Artur Korriku mëson se në dosje po hetohet aktiviteti kriminal i këtij grupi në disa qytete nga Elbasani në Lezhë për vrasje, drogë dhe vjedhje makinash.

Prokuroria deklaroi se ka prova të mjaftueshme që vërteton se autorët e vrasjes së dy të rinjve janë Ndoci dhe Alla. Mbi të gjitha përpos provave në vendin e ngjarjes dhe tabulatet, është edhe dëshmia e bashkëpunëtorit të drejtësisë, Klevis Alla, që pranoi të tregonte gjithçka.