Vranë bashkëatdhetarin me thikë, dënohen me nga 18 vjet burg dy vëllezërit shqiptarë në Itali

Dy vëllezërit me origjinë shqiptare, Ilmi dhe Klinton Rakipaj, të moshës 24 dhe 19 vjeç, janë dënuar me nga 18 vite burg. Ata ndodhen në burgjet e Rovigos dhe Vicenzës dhe akuzohen për vrasje të qëllimshme ndaj një bashkatdhetari, vrasje në tentativë ndaj dy personave të tjerë që mbetën të plagosur rëndë, si dhe për mbajtjen e armëve të ftohta në vend publik.

 Ngjarja tragjike ndodhi në Padova, në oborrin e një pallati në lagjen Forcellini.

Vendimi u shpall nga gjyqtarja Elena Lazzarin në përfundim të një gjykimi të shkurtuar, i cili sipas ligjit ul një të tretën e dënimit. Të akuzuarit u mbrojtën nga avokati penalist venecian, Stefano Marrone, ndërsa prokuroria, e përfaqësuar nga Claudia Brunino, kishte kërkuar një dënim prej 20 vitesh.

Gjykata gjithashtu vendosi që dy vëllezërit të paguajnë nga 300,000 euro për secilin nga dy të plagosurit (të përfaqësuar nga avokati Cesare Dal Maso) dhe nga 250,000 euro për secilin nga prindërit e viktimës (të përfaqësuar nga avokati Martin).

Motivacionet e vendimit do të publikohen brenda 90 ditësh. Kërkesa e mbrojtjes për arrest shtëpie u refuzua.

Ngjarja ndodhi më 23 korrik 2023, në hyrjen e një pallati në rrugën Dorighello 8, në Forcellini, ku banonin vëllezërit Rakipaj.

Ishte mesdita e një të diele kur Albert Deda, 24 vjeç, një ish-bashkëbanues i tyre, mbërriti aty. Ai shoqërohej nga një mik dhe një tjetër bashkatdhetar që kishte ardhur në Itali një ditë më parë.

Deda u kërkoi vëllezërve Rakipaj të strehojnë bashkatdhetarin e sapoardhur, por ata e refuzuan. Situata u tensionua shpejt dhe, sipas dëshmive të të plagosurve, Ilmi e goditi Dedën me kokë.

Pas kësaj, situata përshkallëzoi. Të tre burrat zbritën në rrugë dhe, ndërkohë që personi i sapoardhur u largua, mbërriti një tjetër bashkatdhetar. Ai, së bashku me Dedën dhe mikun e tij, u kthyen në hyrje për të përsëritur kërkesën për strehim.

Megjithatë, sipas versionit të të plagosurve, i cili u pranua nga prokuroria, vëllezërit Rakipaj po i prisnin të armatosur me thika. Sipas mbrojtjes, vëllezërit ishin ata që u sulmuan nga grupi.

Në fund, Albert Deda mbeti i vdekur nga një goditje fatale me thikë në gjoks, ndërsa dy miqtë e tij mbetën të plagosur rëndë me disa goditje.

Vëllezërit Rakipaj, pasi hipën në makinën e tyre dhe tentuan të iknin drejt Sllovenisë, u arrestuan atë mbrëmje, rreth njëzet kilometra larg kufirit, në Friuli Venezia Giulia./ Il mattino di Padova

K.M/Shqiptarja.com

TAG:
• itali
• Ilmi Rakipaj
• Klinton Rakipaj
• padova
• vrasje me thike
• albert deda
• vrasje ne itali