Vrasja e 22 vjeçarit Mihali, Sidrit
Bejleri apel: Kontrolloni fëmijët

Ngjarja e rëndë në të cilën mbeti i vrarë 22-vjeçari Marvi Mihali për karikuesen e telefonit, shkaktoi reagime të shumta nëpër rrjetet sociale dhe më gjerë.

Një nga personat që ka reaguar është edhe këngëtari Sidrit Bejleri, i cili nëpërmjet një statusi në llogarinë e tij në facebook, i bën thirrje prindërve që të kontrollojnë fëmijët e tyre për atë se çfarë shohin dhe çfarë dëgjojnë.

Sipas tij sot serviret muzikë me tekste bastarde nga njerëz që nuk dinë të shkruajnë as emrin e tyre.

Bejleri thotë se kjo muzikë po shkatërron brezin e sotëm, por jo vetëm.

Postimi i Sidrit Bejlerit në facebook:
JU LUTEM VEMENDJE!
Nuk është hera e pare që e them:
Ju lutem prindër, kontrolloni fëmijët çfarë shohin dhe çfarë dëgjojnë, sepse këtu zë fill brumosja e tyre dhe ajo çfarë do bëjnë në të ardhmen. Po ju serviret "muzikë" që nuk është muzikë, nga njerëz që i thonë vetes "artistë". Tekste bastarde që i "shkruajnë" tipa që dyshoj në dinë të shkruajnë edhe emrin e tyre. Kuptojeni një herë e mirë që ata duan të shesin "muzikën" dhe "tekstet" e tyre, por po shkatërrojnë brezin e sotëm dhe jo vetëm. Fëmijë dhe adoleshentë që këndojnë me shpirt llumin që përçohet nga tregtarë të shpifur që në thelbin e ditës së tyre kanë vetëm paranë, duke harruar se kanë fëmijë vete ose do kenë një ditë. 
Po na krijojnë modë dhunën, po na i thurin lavde drogës, prostitutave dhe lakuriqësisë. Po mundohen të na mbushin mendjen se e keqja është e mirë, se alkoli dhe droga të burrërojnë, se imoraliteti duhet të jetë kult i ditëve tona duke harruar që familja është e shenjtë dhe një ditë nuk do donin as ata që t'u cënohej.
Sot gjykoj si prind, por edhe si një person që para pothuaj 20 vitesh isha në moshën e atij djali që mbrëmë ndërroi jetë nga një zënkë banale...
Nuk do i uroja askujt të ishte në vendin e familjes së viktimës ose të vrasësit!
Kontrollojini që në fëmijëri!
Muzika është profesioni im dhe ndikon shumë, më besoni. Mesazhi i saj kthehet në mënyrë të jetuari dersa njeriu fillon dhe kupton realisht, pra piqet!
Të gjithë duam më të mirën për fëmijët tanë.
Gjërat e mëdha bëhen duke filluar nga të voglat!
Drejtojini tek e Vërteta, larg gënjeshtrave të përditshme që gjenerojnë vetëm urrejtje dhe shkatërrim të vlerave!
Helmimit të trupit edhe mund t'ja gjejmë ilaçin, por helmimi i shpirtit vetëm në një vend e ka shërimin...
Me dashamirësi


Postimi i Sidrit Bejlerit në facebook

Redaksia Online
J.Sh Shqiptarja.com