Vrasja e 8-vjeçarit, Nikolla në Report Tv: Makabre, krimineli ishte përkëdhelur në dënimin e parë! 2 iniciativa ligjvënëse në Kuvend! Ta kthejmë debatin në Kuvend, në shina etike (VIDEO)

Kryeparlamentarja Lindita Nikolla e ka konsideruar një ngjarje makabre vrasjen e 8-vjeçarit Mateo Vasiu e cila sipas saj kërkon një reflektim të të gjithëve. Në intervistën ekskluzive të dhënë për Report Tv, Nikolla thotë se krimineli, ky dhunues barbar, kishte qenë i dënuar më parë me një dënim përkëdhelës.

"Shpresojmë që në këtë rast drejtësia të jetë në lartësinë e detyrës për të dhënë dënimin maksimal për këtë akt makabër. Në Parlamentin e Shqipërisë janë depozituar dy iniciativa ligjvënëse, njëra nga një deputete dhe tjetra nga 20 000 zgjedhës. Ndodh ndoshta për herë të parë, pikërisht për të adresuar këtë problem, duke krijuar një regjistër kombëtar të dhunuesve. E kam fjalën këtu jo vetëm të dhunuesve për fëmijët, por edhe për ata ndaj grave dhe vajzave. Dhe besoj që do të jetë një debat shterues për të mundësuar të gjithë spektrin e nevojshëm të ndërhyrjeve ligjore, që raste të tilla të mos përsëriten, që raste të tilla të mos ndodhin", tha Nikolla.

Nikolla u shpreh e vendosur që të bëjë gjithçka që ta vendosë Kuvendit në shinat ku etika është e bazë. Ajo e konsideroi të patolerueshëm tentativën e deputetit të PD-së Ervin Salianji për tu konfliktuar fizikisht me deputetin socialist Erion Braçe.  Nikolla thotë se sigurisht që opozita ka të drejtën e çdo kritike ndaj punëve të bëra jo mirë nga qeveria, por kurrsesi nuk mund të arrijë në denigrime dhe shpifje personale apo deri në konflikte fizike, siç degjeneroi në momentin e fundit.

            Zonja Nikolla, bisedën do ta nisim për një ngjarje të rëndë, për aktin makabër që u regjistrua në fshatin Grecalli të Fierit, me vrasjen e Mateos 8-vjeçar nga Klodian Çalamani 38-vjeçar. Reagimet kanë qenë të shumta, kryesisht jo vetëm nga opinioni publik, por edhe nga politika. Një ndër këta zëra ishin edhe ju. Nënvizuat një zinxhir përgjegjësish apo përgjegjësish, që sollën edhe këtë akt. Çfarë nxori në pah në fakt një krim makabër i tillë?

            Është vërtet një ngjarje tronditëse, një krim makabër, që pa dyshim ka shenjuar thellë, besoj në zemrën e çdo shqiptari, një ndjesi që s’do të donim kurrë të ndoshte, për askënd në botë. Është një shokim total i të gjithë shoqërisë për këtë ngjarje makabre dhe pa dyshim, çdokush do të ndiente nevojën për t’u prononcuar dhe për të thënë që është një moment që duhet të fillojë një reflektim i tërë, nga të gjithë, nga të gjitha institucionet, patjetër nga një zinxhir institucionesh që fshihen prapa këtij akti apo edhe akteve të tjera që ndodhin dhe kanë bazë dhunën dhe krimin. Besoj që, nga informacionet që kemi, jemi të informuar që personi në fjalë, krimineli, ky dhunues barbar, kishte qenë i dënuar më parë, një dënim përkëdhelës – e kam quajtur unë, për një akt shumë të rëndë dhunimi dhe më pas, patjetër teksa dëgjoja komunitetin që fliste pata ndjesinë që është e nevojshme dhe duhet, se edhe komunitetet reflektojnë, për të mos heshtur, për ta denoncuar dhunën dhe për t’u ngritur për të parandaluar akte të tilla makabre. Sigurisht edhe këtu, patjetër, sa dhe si nga komuniteti ka pasur denoncime në polici, si ka reaguar policia, si ka reaguar punonjësi i policimit komunitar, shërbimet psiko-sociale e me radhë, janë një sërë, një zinxhir hallkash që patjetër duhet të kenë përgjegjësitë e tyre dhe refleksionet e tyre në këtë proces dhe sigurisht, drejtësia që nuk ka dhënë dënimin e merituar, por shpresojmë që në këtë rast ajo të jetë në lartësinë e detyrës për të dhënë dënimin maksimal për këtë akt makabër.

            Dhe në fakt, zhvillimet që ishin sot përpara Gjykatës së Fierit, atje ku pritej të jepej edhe masa e arrestit për Klodian Çalamanin, kanë sjellë një situatë të pazakontë edhe nga familjarët. Kërkojnë dënimin me vdekje apo me varje në litar. Dihet që nga ana shtetërore, ky është një vendim që nuk merret dhe nuk jepet. Por realisht, zonja Nikolla, mendoni se duhet të insistohet te ndryshimet ligjore për ashpërsimin e dënimit të këtyre personave?

            Patjetër. Besoj që ky akt dhe akte të tjera do të ngrenë në të gjithë debatin publik edhe adresimin për të pasur përmirësime ligjore për njerëzit që janë përsëritës, për njerëz që kryejnë vepra të tilla makabre dhe ne jemi, unë si kryeparlamentare, më lejoni t’ju bëj me dije që në Parlamentin e Shqipërisë janë depozituar dy iniciativa ligjvënëse, njëra nga një deputete dhe tjetra nga 20 000 zgjedhës. Ndodh ndoshta për herë të parë, pikërisht për të adresuar këtë problem, duke krijuar një regjistër kombëtar të dhunuesve. E kam fjalën këtu jo vetëm të dhunuesve për fëmijët, por edhe për ata ndaj grave dhe vajzave. Dhe besoj që do të jetë një debat shterues për të mundësuar të gjithë spektrin e nevojshëm të ndërhyrjeve ligjore, që raste të tilla të mos përsëriten, që raste të tilla të mos ndodhin. Sigurisht, nuk është një fenomen vetëm shqiptar, por ne duhet që të gjithë si shoqëri, si institucione, të marrim të gjitha përgjegjësitë për të mundësuar që akte të tilla barbare, por edhe akte të tjera të dhunës, të dhunës ndaj fëmijëve, të dhunës me bazë gjinore, të mund të jenë gjithnjë e më të pakta në shoqërinë tonë.

            Nga drejtësia këtë herë, prisni të japë dënimin maksimal?

            Po besoj dhe bëj një apel që drejtësia të jetë në lartësinë e drejtësisë që presin shqiptarët, në lartësinë e drejtësisë që pret familja e Mateos së vogël dhe pa dyshim, i gjithë kujtimi për atë engjëll që sot duhej të ishte në shkollë, por në fakt atij i është marrë jeta në mënyrë barbare.

            Një apel në fakt, e keni edhe për shoqërinë. Të mos ngrihemi dhe të irritohemi kur këto akte ndodhin, por të kemi mundësinë që edhe t’i parandalojmë.

            Patjetër, të ngremë të gjitha instrumentet e alertit, të gjitha instrumentet e denoncimit, të gjitha instrumentet e reagimit për t’i parandaluar këto akte. Teksa dëgjoja ata banorë që flisnin që ky ishte njeri problematik, që ata ruanin fëmijët, që kishte pasur akte, edhe sulme përdhunimi nga ky njeri, besoj që këto kanë qenë nevojshëm dhe mjaftueshëm indicie që ai komunitet të ishte një barrikadë e fortë adresimi dhe ngritje zëri kundër personit në fjalë.

            Zonja Nikolla, do të doja ndërkohë që të ndaleshim pak edhe te zhvillimet e seancave parlamentare. Ajo më e fundit është parë tepër e ndezur, madje deri në përplasje thuajse fizike mes deputetëve, por çfarë u fokusua më tepër ishte çështja e komunikimit, e mungesës së etikës dhe e respektit ndërmjet deputetëve kur kanë marrë fjalën e tyre. A do të vihet njëherë e përgjithmonë në zbatim Kodi i Etikës edhe në sallën e Kuvendit të Shqipërisë?

            Po, patjetër. Unë jam shumë e vendosur që të bëj gjithçka për sa më takon edhe si politikane, por edhe në detyrën e lartë e cila më është besuar, që e gjithë jeta parlamentare të kthehet në shinat ku etika është e dhëna bazë, ku ata që kanë votuar për ne dhe opinioni publik, të rinjtë dhe të rejat e Shqipërisë, burrat dhe gratë e Shqipërisë, të shohin në debatin parlamentar debatin për çështjet që atyre u interesojnë, sigurisht debatin për politika që e çojnë Shqipërinë drejt zhvillimit, për reforma që e çojnë Shqipërinë drejt integrimit, patjetër për kritika ndaj punëve të bëra jo mirë nga qeveria, por kurrsesi në denigrime dhe shpifje personale apo deri në konflikte fizike, siç degjeneroi në momentin e fundit. Nuk është e thjeshtë sepse përballemi me një kulturë 30-vjeçare, ku denigrimi politik përmes shpifjes, përmes gjysmë të vërtetave apo gënjeshtrave, ka prevaluar dhe gati-gati është kthyer në një normë në debatin politik. Këtu duhet kontributi i të gjithëve dhe kur them i të gjithëve, patjetër, në radhë të parë, janë të gjithë ata politikanë që adresojnë debatin publik dhe debatin politik. Por do të doja këtu pa dyshim, edhe ndihmën e opinionit publik, por edhe të medieve posaçërisht, për të mos qenë dhe vetëm thjesht zëdhënësi i faktit se çfarë ndodhi në parlament, se si një moment i caktuar degjeneroi në akte jo etike apo larg qoftë, dhune, por patjetër që të shërbejnë edhe ata me lajmin, me informacionin, pse jo edhe me komentin, për të qenë bashkë në këtë front, për t’i kthyer vlerat e vërteta debatit politik dhe debatit publik, ku besoj dhe shpresoj që etika do të jetë kryefjala. Unë jam e vendosur që të bëj gjithçka, por patjetër duhet që të jemi të gjithë bashkë në këtë front. Nuk mjafton vetëm një ose disa zëra.

            Shpeshherë ju kemi parë edhe në vështirësi, arrini që të ndërprisni edhe seancën. Jeni etiketuar në fakt edhe si personi i duhur, në vendin e duhur, për dialogimin në mes dy forcave kundërshtare në politikë, por duke qenë mbi palët shpeshherë mundoheni që të bëni apele edhe për qetësi. Ndodh kjo jashtë sallës së parlamentit, apo gjithçka është në syrin e kamerave?

            Jo, për hir të së vërtetës, komunikimi dhe qetësia, etika, janë disa vlera të cilat unë nuk do t’i tradhtoja kurrë, në asnjë lloj pozicioni, shtuar faktit që në këtë pozicion që jam, besoj që janë vlera që përkundrazi ndihmojnë. Nuk është një sjellje që shfaqet vetëm në ditën e seancës parlamentare, por edhe në çdo kontakt, takim me kolegët nga opozita, me kryetarin e grupit të opozitës, të cilën e falënderoj për bashkëpunimin e treguar deri më tani, në konferencën e kryetarëve aty ku vendosim për seancat plenare dhe në çdo tryezë tjetër, ku duhet të komunikohet dhe të dialogohet. Besoj që duhet patjetër që të gjithë të kuptojmë që sa më shumë ne humbim qetësinë, etikën, sa më shumë i largohemi së vërtetës, aq më pak populli shek te ne vlerat që do të donte t’i mbështeste dhe do të donte që të ishin përfaqësuesit e tyre. Por patjetër që duhet ta përmend edhe njëherë, që është një kulturë e rrënjosur thellë 30-vjeçare, dhe besoj se publiku i njeh me emër dhe mbiemër dhe mund ta drejtojë gishtin ndaj personave që gjithmonë shpifjen e kanë parë si armën e vetme të luftës politike.

            Jeni pak më shumë se dy muaj në krye të organit më të lartë ligjvënës në Shqipëri. Sa e vështirë apo si po përballeni me këtë sfidë, në këtë lloj pozicioni zonja Nikolla, përgjatë kësaj kohe?

            Patjetër që është një pozicion sfidues, në kuptimin që, po e përsëris, unë nuk jam e para grua Kryetare e Parlamentit, jam e dyta, por jam e bindur dhe e ndjeshme që publiku pret një rol të ri, një qasje të re nga unë, për të ofruar më shumë komunikim, më shumë transparencë, më shumë etikë, më shumë dialog konstruktiv dhe, e përsëris edhe njëherë, unë jam e vendosur që për sa më takon mua, të bëj gjithçka që kjo të ndodhë në Kuvendin e Shqipërisë. Patjetër në këto muaj të kësaj legjislature, Kuvendi është futur, edhe me kthimin e opozitës në punën e saj normale, do ta quaja, janë miratuar 9 ligje, 19 vendime, janë konstituuar dhe kanë filluar nga puna komisionet e përhershme parlamentare, janë iniciuar dhe kanë filluar nga puna edhe dy komisione hetimore të kërkuara nga opozita, ashtu sikurse janë futur në procedurë parlamentare edhe puna për propozimet për ndryshimet kushtetuese, sikurse kemi pasur besoj edhe publiku i ka ndjekur, dy seanca të rëndësishme, seanca maratonë, ato që lidhen me formatimin e qeverisë, pra me miratimin e programit politik të qeverisë dhe buxheti i vitit 2022. Shpresoj që çdo ditë e më shumë, edhe fakti që ne duhet të punojmë të gjithë bashkë për të shtyrë përpara proceset integruese, për të shtyrë përpara reformat e këtij procesi, pra reformat e Shqipërisë për t’u integruar në Evropë, që në fakt janë reforma që përfitojmë ne njerëzit sepse duam ta bëjmë, të sjellim standardin evropian në shoqërinë shqiptare dhe besoj që këtu nuk do të ketë ndasi, por do të ketë angazhime dhe shpresoj e uroj, angazhime nga të gjitha palët për të punuar në interes të qytetarëve.

            Megjithatë, ju e thatë edhe vetë, është rikthyer opozita në Parlamentin e Shqipërisë pas bojkotit që i bëri dy vite më parë edhe të parlamentit, por gjithsesi zonja Nikolla, e shikoni si një vlerë debatin politik dhe publik që ata sjellin në Kuvendin e Shqipërisë apo mendoni se përgjatë kësaj kohe janë fokusuar pikërisht te sulmet apo tek akuzat ndaj mazhorancës dhe çfarë sjell kjo?

            Patjetër, rikthimi i opozitës në parlament është një vlerë e demokracisë. Parlamenti plotësoi të gjithë spektrin e funksionimit të tij shumëpartiak. Por nga ana tjetër edhe deputetët për të cilët populli ka investuar besimin, duhet të funksionojnë aty ku është habitati i tyre, që është salla e parlamentit dhe i gjithë aktiviteti parlamentar, përfshirë këtu punën në komisione. Pa dyshim është një vlerë e shtuar në komunikimin politik. Është një vlerë e shtuar për sa i përket funksionit të kontrollit parlamentar që Kuvendi ushtron jo vetëm në miratimin e ligjeve, por edhe në funksionalitetin e qeverisë. Sigurisht ka shumë dhe do të doja që të ishte edhe në lartësinë e komunikimit publik, në kuptimin që në këtë komunikim qytetarët të shohin gjithnjë e më shumë të fokusuar te çështjet, problematikat dhe shqetësimet që qytetarët kanë dhe të shohin gjithnjë e më pak sulme politike dhe atë, le të themi, dialogun që shpeshherë është i mbushur me gjysmë të vërteta apo me të pavërteta.

            Për t’u ndalur pak te njëri prej projektligjeve, i cili është miratuar edhe në Kuvendin e Shqipërisë. Bëhet fjalë për atë të bashkëqeverisjes. Në fakt, i vihet në shërbim komunitetit, por që është anatemuar shumë edhe nga ana e opozitës. Çfarë do të sjellë të re ky ligj, qoftë edhe nga mënyra se si do të ketë qasjen komuniteti apo qytetarët përballë institucioneve. E cenon mbarëvajtjen dhe funksionimin e punës së organeve në administratë apo qoftë edhe të institucioneve ky ligj?

            Unë besoj që bashkëqeverisja ka qenë një mekanizëm i mirë që ka funksionuar gjatë mandatit të dytë përmes platformës “Të bashkëqeverisim për Shqipërinë që duam”. Unë, në një moment të caktuar, kam qenë prezente në detyrën si ministre e Arsimit, se si ka funksionuar Agjencia për Dialog dhe Bashkëqeverisje. Fakti që në këtë platformë janë drejtuar rreth 140 000 qytetarë dhe 53 000 kanë marrë përgjigje dhe kanë gjetur zgjidhje, ka qenë një platformë e mirë edhe për kontrollin e qeverisë. Janë realizuar rreth 42 interpelanca me drejtues të institucioneve apo me ministra, ashtu sikurse ka pasur edhe masa administrative, rreth 905 në dijeninë time, për të gjithë ata punonjës të administratës publike, të cilët nuk janë përgjigjur apo janë gjetur në shkelje pas problematikave që janë përcjellë në platformë nga qytetarët. Por ndërkohë, jo gjithmonë, jo të gjitha institucionet dhe këtë e dëshmoi edhe në vetën e parë, ne ishim me prioritet të gjithë procesin që ndodhte në platformën e qeverisjes sepse shfokusoheshim tek agjenda të tjera, te reforma të tjera dhe të gjitha përgjegjësitë e tjera që kishte në funksion institucioni përkatës. Ndaj në këtë drejtim, besoj që Agjencia për Dialog dhe Bashkëqeverisje është përballur me sfida për mos përgjigjen në kohën e caktuar ndaj qytetarëve, mos çuarjes së problematikës në thelbin e zgjidhjes dhe besoj që ngritja në ligj e punës së këtij institucioni do të mundësojë një normim të ri të funksionalitetit dhe të organizimit të agjencisë, gjithmonë në favor të asaj që platforma e bashkëqeverisjes kërkon, së pari, përgjigje dhe zgjidhje të shpejtë të problematikave qytetare; adresimin në kohën e duhur të çështjeve dhe, patjetër, nxjerrjen e përgjegjësive për autorët të cilët kanë shkelur detyrën duke dhënë vendime të gabuara apo duke mos kthyer përgjigje. Unë kështu e besoj dhe mendoj që shumë shpejt publiku, ata që e kanë ndier në fakt edhe përmes platformës së bashkëqeverisjes, tani duke u kthyer dhe duke u standardizuar në ligj, do të rrisë më shumë përgjegjësitë për të marrë në kohën e duhur shërbimin, për të marrë një shërbim më cilësor dhe sigurisht për t’u dhënë përgjigje shumë e më shumë çështjeve që adresohen nga qytetarët. Ndërkohë, është një mundësi sërish e mirë edhe e standardizuar në ligj, që qytetarët të marrin pjesë, të jenë realisht në qeverisje përmes kërkesës së tyre për ide apo prezantimit të projekteve të tyre apo kërkesës për interpelanca në çështjet kur ata e shikojnë që nuk po adresohen.

            Zonja Nikolla, e zhvendosim tashmë fokusin edhe te çështjet integruese të Shqipërisë në Bashkimin Evropian. Gjithnjë e më tepër vihet re prezenca e ndërkombëtarëve, jo vetëm në Shqipëri, por duhet thënë që edhe ne jemi sa më prezentë në vendet e BE-së. Si po ecet në këtë drejtim dhe a kemi shanse që të mblidhet sa më shpejt Konferenca e Parë Ndërqeveritare që të mundësojë çeljen e negociatave më pas për anëtarësimin?

            Më vjen mirë për pyetjen dhe besoj që pa adresuar thjesht dhe fare fjalët që ne themi, qeveria shqiptare thotë, institucionet shqiptare thonë, mjafton të shikojmë reagimin që të gjitha vendet anëtare bëjnë për këtë proces, të gjitha pa përjashtim, edhe ato që ishin skeptike dy vite më parë shprehen se Shqipëria i ka plotësuar kushtet për mbajtjen e Konferencës së Parë Ndërqeveritare. Këtë gjë e theksoi edhe progresraporti i publikuar në tetor të këtij viti, ashtu sikurse edhe unë pata nderin dhe kënaqësinë të dialogoja dhe të takoja reporteren për Shqipërinë në Parlamentin Evropian, zonjën Santos, e cila edhe në deklaratat e veta për shtyp konfirmoi që Shqipëria i ka përmbushur të gjitha kushtet që i ishin vënë përpara. Sigurisht që ka ende shumë për të bërë dhe kërkoi bashkëpunimin dhe dialogun midis të gjitha palëve për të adresuar reformat që janë të rëndësishme për të ecur përpara në rrugën e integrimit. Kryefjalë mbetet avancimi i Reformës në Drejtësi, avancimi në Reformën Elektorale, duke adresuar të gjitha rekomandimet që OSBE-ODIHR-i ka dhënë, por patjetër edhe për të parë të gjithë procesin e ndërtimit të ligjeve në përafrimin me standardet e BE-së. Pra janë fakte që thuhen nga vendet anëtare, të cilat dëshmojnë po ashtu që ngërçi që mund të ndodhë, vjen nga fakti jo i Shqipërisë, por i një mosdakordësie që ka midis Bullgarisë dhe Maqedonisë së Veriut dhe këtë e thotë edhe vetë Bullgaria, e cila deklaron që nuk kemi asnjë problem me procesin integrues të Shqipërisë, por ne jemi në një proces mosdakordësie me Maqedoninë e Veriut, që dashje pa dashje penalizon edhe Shqipërinë, meqenëse këto dy vende shihen së bashku në këtë proces.

            Raportet tuaja ndërkohë me Presidencën, si do t’i përkufizonit? Dhe kryesisht, pse jo, edhe me kreun e shtetit Ilir Meta?

            Raporte institucionale, komunikim institucional midis dy, le të themi, institucioneve tona, institucionit të Presidentit të Republikës dhe Parlamentit të Shqipërisë.

            Është pozitive zonja Nikolla, që shohim në sallën e Kuvendit të Shqipërisë edhe platforma, të cilat bëjnë apel për vaksinimin e popullatës dhe jo vetëm. Është 100% e vaksinuar salla e Kuvendit të Shqipërisë? Kam parasysh të gjithë parlamentarët, deputetët, e gjithë organika?

            Po, unë marr informacion të vazhdueshëm për këtë proces dhe ju them që në momentin që po flasim, janë vetëm 8 deputetë të pavaksinuar. Janë ndarë 4 nga opozita dhe 4 nga mazhoranca dhe arsyet që pse ende nuk janë vaksinuar janë sepse sapo kanë kaluar COVID-19 dhe po presin atë afatin kohor siç e kërkojnë edhe mjekët, për të kryer procesin e vaksinimit. Por, ndërkohë, ata paraqesin testin në çdo pjesëmarrje në aktivitetin e parlamentit.

            Ndërkohë, zonja Nikolla, në legjislaturat e mëparshme kemi parë fushata ndërgjegjësimi apo të ndërmarra si shenjë sensibilizimi nga kryeparlamentarët, në krye të këtyre institucioneve. Ju vetë, do të ndërmerrni një të tillë në shenjë simbolike apo edhe shërbimi?

            Nuk e kam fare simbolike, por e kam me tërë forcën e mendjes dhe të zemrës, për të adresuar çështjet e dhunës, çështjet e dhunës ndaj fëmijëve dhe të dhunës me bazë gjinore. Dhe për këtë, patjetër janë dy instrumente të rëndësishme që kolegët e mi deputetë m’i kanë dhënë me gatishmërinë e tyre për t’u bashkuar në dy grupe vullnetare, siç është ai “Miqtë e Fëmijëve” dhe “Aleanca e Grave Deputete”, që do të kthehen në dy grupe besoj, me programe të dedikuara në këtë qëllim të përbashkët që ne kemi për të adresuar çështjet e dhunës, pa i ndarë, por me fokus të posaçëm dhunën ndaj fëmijëve dhe dhunën me bazë gjinore.

            Dhe është një fenomen, i cili në fakt duhet të zbutet sa më shumë, sepse po shohim gjithnjë e më shumë që ka një rritje si plagë sociale. Duket se ka një intensifikim marrëdhëniesh mes Kuvendit të Shqipërisë dhe atij të Kosovës. Po kalojmë në një stad të ri të ndërtimit të raporteve dhe të marrëdhënieve?

            Po, është e vërtetë. Është prioritet i punës sime edhe intensifikimi i marrëdhënieve me Parlamentin e Kosovës. Unë vizitën e parë si kryeparlamentare e bëra në Kosovë. Pata një dialog të rëndësishëm me Kryeparlamentarin Konjufca, po ashtu edhe me Kryeministrin Kurti dhe dakordësuam që ne duhet të kemi një plan të përbashkët pune, veprimi në të ardhmen. Kemi institucionalizuar, ndodhi për herë të parë, tryezën e kryetarëve të komisioneve të përhershme të Shqipërisë dhe të Kosovës, në mënyrë që ne, teksa përafrojmë ligjet me BE-në, përafrojmë edhe ligjet midis dy vendeve tona. Por nga ana tjetër, të shërbejë një tryezë e mirë edhe një sy monitorues, në kuptimin e impaktit që ligjet e Shqipërisë kanë për qytetarët e Kosovës apo anasjelltas. Jemi duke punuar po ashtu dhe shumë shpejt do të kemi institucionalizimin edhe të tryezës së kryetarëve të delegacioneve në institucionet ndërkombëtare. Nuk mund ta tolerojmë dhe nuk mund të lejojmë që anëtarët e delegacioneve, si të Shqipërisë edhe të Kosovës, njihen dhe flasin për çështjen vetëm në momentin kur takohen në tryezën e ftuar nga ndërkombëtarët. Kjo duhet të bëhet një punë e standardizuar dhe e dakordësuar përpara se të shkohet në këto tryeza dhe që të ndodhë kjo, ne do ta institucionalizojmë tryezën e përbashkët të delegacioneve, ashtu sikurse jemi, pa dyshim, të vendosur që në ato organizma ndërkombëtare ku Kosova nuk bën pjesë, ne të jemi një zë i vetëm kur flasim për çështjen e Kosovës, për rëndësinë e dialogut Kosovë-Serbi, për nevojën e njohjes e Kosovës edhe nga shtetet e tjera, ashtu sikurse edhe për të ngritur zërin për çështjen e liberalizimit të vizave ndaj Kosovës, ndërkohë që është deklaruar që Kosova ka vite që i ka plotësuar standardet për këtë çështje.

            Me krijimin e një marrëdhënieje edhe me median zonja Nikolla, ne transmetojmë gjithçka në media, nuk po flas vetëm për Report TV, në zhvillimin e seancave parlamentare. Por, sigurisht, nuk na vjen mirë kur ndodh ajo mungesë etike apo respektimi ndaj njëri-tjetrit. Ju, si kryeparlamentare, çfarë do të donit të mos shikonte publiku në momentin e zhvillimit të këtyre seancave në transmetimet e drejtpërdrejta?

            Tani, për hir të transparencës, mirë është që publiku t’i shohë të gjitha. Por do të doja, dhe ftesa këtu është për mua të parën, që patjetër duhet të jem një model i etikës dhe i komunikimit qytetar, dhe ftesa është për të gjithë kolegët se të gjithë kanë vend për të reflektuar dhe për të bërë të mundur që në Kuvendin e Shqipërisë, publiku të shohë njerëz të përgjegjshëm; së pari, njerëz edhe qytetarë, të cilëve iu është investuar besim përmes votës që njerëzit kanë dhënë në komunitetet ku ne jemi votuar, dhe patjetër, gjithnjë e më shumë publiku duhet të shohë shumë edhe më shumë, kur flitet për ta, për problemet që janë të shumta dhe patjetër për një spektër të gjerë mënyrash se si i shohin çështjet dhe si i shohin zgjidhjet mazhoranca apo opozita, duke ofruar argumente, duke ofruar zgjidhje, duke ofruar politika dhe sa më pak baltë, sa më pak denigrime personale, gjuhë urrejtjeje, gjuhë seksiste, dhe sigurisht pastaj nuk tolerohen edhe këto shfaqjet e përplasjes dhe të dhunës fizike.

 

Intervista e plotë

Rendit zhvillimet sipas orarit:

Të Fundit Të Parat

/KT/Shqiptarja.com

TAG:
• Lindita Nikolla
• Kuvendi i Shqiperise
• integrimi ne be
• vrasja e mateo vasiut