Vrau dhe murosi të renë shqiptare, autori para gjykatës: Jam i pafajshëm! Nuk e dinte që trupi i Sibora Geganit ishte gjetur

Marco Romeo, autori i dyshuar i vrasjes së s Sibora Geganit, shqiptares së zhdukur prej vitit 2014, është deklaruar i pafajshëm para gjykatësit. E reja italo-shqiptare humbi çdo gjurmë pasi u largua drejt Spanjës me të dashurin e saj Romeo nga Nettuno i Italisë, vend ku jeton ende familja e saj. 

Më 6 qershor të këtij vitit, pas deklaratave spontane të Romeos, i cili ishte i arrestuar për një vrasje të dytë, atë të një vajze spanjolle 28-vjeçare, nënë e fëmijës së tij, në murin e apartamentit ku ai kishte jetuar me Siborën, u gjet i fshehur trupi i një gruaje. Në momentet e para Marco Romeo rrëfeu vrasjen e Siborës, por në fund u tërhoq krejt papritur dhe u deklarua i pafajshëm para trupës gjykuese.

Ky deponim para gjyqtarit është bërë me 31 maj, pra kur trupi i shqiptares ende nuk ishte gjetur i murosur në apartament. Atë ditë Marco ishte zyrtarisht nën hetim për çështjen e rihapur nga gjykata, pas deklarimeve spontane të tij në polici. Gjatë qëndrimit në burg, Marco Romeo mësoi se dy përpjekjet e para për të gjetur trupin e Siborës pas indikacioneve të tij, kishin dështuar. Kështu ai vendosi të luajë kartën e të pafajshmit para gjykatës.

Por tashmë që trupi është zbuluar, nuk ka më vend për dyshime. 45-vjeçari Marco Romeo do të duhet të përballet në Spanjë me akuzën e vrasjes së dyfishtë.

Ndërsa nëna e Siborës e cila vazhdimisht ka dyshuar se pas zhdukjes së vajzës së saj fshihet i dashuri, është ende në pritje të rezultatit të testit të ADN-së. Në 2014-ën, kur u largua me të dashurin që kishin vetëm një vit lidhje, Sibora Gagani ishte 22 vjeç dhe punonte si kamariere në qytetin Costa del Sol.

SI.E./KT/Shqiptarja.com

TAG:
• Marco Romeo
• Sibora Gegani