Vendimi për vulën e PD-së/ Meçaj në Repolitix: Basha e kreu misionin, e shpalli liderin e opozitës! Avokati: Berisha thotë hajdeni me ne, por nuk lëshon karrigen

Vendimi për vulën e Partisë Demokratike duket se mori një drejtim serioz ditën e sotme, teksa Gjykata e Apelit la në fuqi vendimin ‘Zhukri’ të Shkallës së Parë që njeh Kuvendin e 11 dhjetorit të Rithemelimit si legjitim dhe Sali Berishën kryetar.

Analistët në 'Repolitix' në Report Tv, zbuluan më shumë se çfarë ndodh pas këtij vendimi dhe cili do të jetë rrugëtimi i opozitës dhe pjesëve të PD-së drejt zgjedhjeve të 2025-ës.

Arben Meçaj u shpreh për Denis Mingën se nuk sheh ndonjë të re në vendimin e sotëm të Gjykatës së Apelit për t'ja kaluar vulën Berishës dhe Rithemelimit. 

'Një çështje gjyqësore 2 vjet e gjysëm, u gjet një formulë shumë e shpejtë për ta zgjidh këtë krizë. Basha ishte në siklet, por nuk shoh Bashën që qesh. Më intereson parti e Bashës çdo bëjë. Nëse Basha do vendos që çështjen ta çojë në Gjykatën e Lartë, do të thotë që Basha është në skemën e para dy vitesh. Nëse Basha do merrte vendimin që të mos e përjashtonte Berishën, ky i fundit nuk do ishte lider. Basha është vërtetë në këtë lojë. Nëse thotë që e fusim në këtë procedurë është lojë. Basha e kreu misionin tani e shpalli liderin e opozitës.

E vetmja zgjidhje është krijjimi i partisë së re. Është e detyruar të krijojë parti të re. Koha nuk i premton, zgjedhjet janë në një vit. Nëse vazhdon punën me PD euroatlantike, pikërisht këtu do fillpoj të prodhojë karshillëkun Berishës. Kjo është logjika elementare. Pres që sot në darkë të shpall krijimin e partisë së re.

Gazetari Flogert Muça shprehet se sot Basha është çliruar nga një përgjegjësi shumë e madhe, pasi i iku vula.

'Basha sot është çliruar. Ka shpëtuar. E imagjino dot të merret vulën dhe logën dhe të shkonte në zgjehdje dhe të dilte apo jo deputet. Kush ka humbur ndonjëherë përballë Bashës? Kur ka fituar Basha ndonjë herë? Lulzim Basha, e kemi thënë, që PD defacto ishte e Sali Berishës. Në këtë kuptim nuk ka asnjë surprizë. Nuk e di anën ligjore. Për Bashën sot ishte lajm i mirë. Ka shpëtuar. Paradoksi, ndërkohë që Basha ishte i gëzuar, Sali Berisha nuk është i gëzuar që ka marrë vulën. Për Berishën vula është dënimi i tij, sepse i bie alibia.'

Ndërsa për avokat Përparim Çaçën, Basha nuk duhet të ishte më në këtë lojë dhe të kishte dhënë dorëheqje që prej vitit 2021 pas zgjedhjeve të prillit.

'E vetmja shpresë që ka pasur PD zyrtare ka qenë vetëm logo. Sepse nëse është ai që mendon se nuk ka nevojë për logo, ofiqe le të krijojë parti dhe të masi forcat. Gjithë këtë kohë nuk bëri për vete asnjë. Aty ku e filloi aty ngeli. Kjo që ndodhi sot, duhet të kishte ndodhur pas humbjes së zgjedhjeve të 25 prillit. Do kishte qenë në nderin e tij. Duhet të kishte dhënë dorëheqjen. Bëri një lojë.

Edhe për avokatin Leonard Karaj, Basha duhet të krijojë një parti të re sa më shpejt, ndërsa ftesën e Berishës për të gjithë demokratët e shikon si hipokrizi.

'Ka akoma disa njerëz me kontribute në PD, të cilët morën qasje nga PD zyrtare. Duhet të jenë më të zhgënjyer. Dhe Basha vazhdon e buzëqesh. Nëse Basha dhe grupimi i tij që nuk janë pak. Kjo parti e re o ngjizet tani ose nuk ngjizet më fare. Se dita ditës shpërbëhet. I bie të jetë një politikan i paaftë. Ose ka qenë bashkë me Berishën gjatë gjithë kësaj periudhe. Ka shumë nga këta njerëz që nuk duan më të shkojnë tek Berisha. Gjëja më e mirë është që Basha ta ndërtonte partinë e vet, sepse është një koshere me vota që nuk shkojnë tek Rama. Berisha thotë hajdeni me ne, por asnjë nuk lëshon karrigen. Ata e marrin karrigen edhe kur ikin në shtëpi. Çështë kjo idiotizëm që partia është e hapur. Ore kjo gjykata sot ishte gjykata e Ramës apo e reformuar. Kjo drejtësia sot, deri dje ishte e kapur, po sot është e Ramës.'

Më tej në emision foli në lidhje Skype edhe deputeti i Partisë Demokratike, Saimir Korreshi hodhi idenë se nesër Sali Berisha mund të jetë në seancën plenare i pranishëm pas depozitimit të kërkesës për interpelancë me kryeministrin Rama. 

'Mendoj se Berisha është shahist i vjetër, priten të papritura prej tij. Nuk dua të lë dhe njerëzit pa gjumë. Nuk kam informacione për këtë, për ardhjen në parlament ose jo. Kërkesa për interpelancë janë votuar shumë herë. Sa herë që Rama e shikon një opozitë të tillë të luftës, i jep mundësi edhe të tallet me Kuvendin e Shqipërisë. Që nga sot nuk ka më fjalë.' u shpreh deputeti Saimir Korreshi.

Sakaq, po ditën e sotme ambasadotri gjerman postoi një foto gjatë takimit me deputetin Gazment Bardhi, ku shkruante se është në kuadër të takimeve me liderët e opozitës dhe mazhorancës në parlament.

Kjo ngriti idenë në studio se tashmë ndërkombëtarët njohin Bardhin si kryetar të opozitës, de jure tashmë edhe pas vendimit të Apelit për vulën e PD-së.

Rendit zhvillimet sipas orarit:

Të Fundit Të Parat

G.K/r.k./Shqiptarja.com

TAG:
• Saimir Korreshi
• repolitix
• Arben Meçe
• perparim caca
• leonard karaj
• flogert muca