TIRANE- Bashkia e Kamzës, e drejtuar nga Xhelal Mziu, ka rendur të nderojë presidentin të Shteteve të Bashkuara të Amerikës, Donald Trump, kur nuk ka kaluar as një muaj nga zgjedhja e tij në krye të Shtëpisë së Bardhë.

Në mbledhjen e radhës të Këshillit Bashkiak të Kamzës, i është akorduar titulli “Qytetar Nderi” Presidentit të 45-të të Shteteve të Bashkuara të Amerikës.

Këshilltarët e Bashkisë së Kamzës e votuan në mënyrë unanime projektvendimin në të cilin propozohej shpallja “Qytetar Nderi” të Presidentit amerikan Donald Trump, me motivacion: “Si një model revolucionar i rendit të ri demokratik, një ekspert ekonomik, një negociator në politikat e jashtme, një komunikues mendjemprehtë popullor dhe një udhëheqës i kohëve moderne”.

Në deklaratën e Bashkisë së Kamzës thuhet se: "Donald John Trump lindi me 14 qershor 1946 Neë York. U diplomua në vitin 1968 në Universitetin e Ekonomisë në Pensilvani. Në vitin 1971 ai u bë president në firmën e ndërtimit “Elizabeth Trump and the Son” dhe e quajti atë “Organizata Trump”, duke e bërë atë një ndër shoqëritë më të fuqishme në botë. Në vitin 2016 ai u nominuar për President të të gjithë amerikanëve duke thyer çdo rekord votuesish si një model revolucionar i rendit të ri demokratik në mbarë botën.

“Ai premtoi se “do të punojë edhe me ata që nuk e mbështetën për të bashkuar vendin, pasi fushata e tij ishte një lëvizje e madhe, nga njerëz që duan një vend më të mirë për veten dhe familjen. Ishte një lëvizje që përfshiu të gjitha racat, gjinitë, fetë për ta bërë Amerikën të madhe sërish”…

Edhe pse media kërkoi që Trump të linte garën – ai kurrë nuk u dorëzua, nuk i zhgënjeu mbështetësit e tij, pasi arriti të ridimensiononte format e komunikimit publik direkt me qytetarët. Trump nënvizoi se çështjet që do të trajtonte si President ishin: dhuna në Amerikë, ekonomia, emigracioni, tregtia, terrorizmi. Plani i tij do të vendosë Amerikën, interesat e popullit amerikan dhe sigurinë amerikane në vend të parë, duke rivlerësuar raportet gjeopolitike në botë në të mire të të gjithëve”.

(er.nu/shqiptarja.com)