Yllka Cana, jehonë në ShBA: Në
Kosovë do të kthehem gjenerale

GJILAN - Yllka Cana, togere shqiptare në Ushtrinë Amerikane nga Livoçi i Gjilanit, ka bërë tashmë jehonë në tërë ushtrinë amerikane.  Ema Jones, një mike e Yllkës, ka dërguar enkas për Rajonipress sekuenca dhe biseda të shkurtra të Yllka Canës, dhënë mediave amerikane.
 
Mesazhi i Yllkës në të gjitha këto intervista është se ajo në Kosovë pret të kthehet me gradën e gjeneralit. “Është një vajzë e re, e bukur dhe me zemër të madhe, me emrin Yllka Cana dhe është nga Livoçi i Gjilanit, e cila ka gradën e togerit në Ushtrinë Amerikane", thuhet në media.

Yllka shërbeu në Kosovë për një vit në misionin paqeruajtës dhe tani ajo është duke u përgatitur për të shkuar në një tjetër luftë. Ajo u largua nga Kosova me lot dhe na premtoi se do të vijë përsëri për të ruajtur paqen. Zemra ime u thye kur aeroplani u largua nga Aeroporti i Prishtinës”, ka thënë Yllka Cana për mediet amerikane.
 
Yllka e përfundoi me sukses misionin e saj në Kosovë dhe fitoi shumë medalje, kurse fjala e fundit e saj përshëndetëse ishte shumë serioze, por e lezetshme.
 
“Shpresoj që ju kam bërë krenar me punën time Kosovë, mirupafshim dhe atje do të kthehem kur të bëhem gjenerale”, citohet Yllka nga mediet amerikane. Këto fjalë të Yllkës kanë prekur shumë zemra amerikane.
 
Mbi të gjitha fjalët e komandantit të Yllkës kanë qenë të mëdha. “Yllka kurrë nuk dorëzohet, madje ajo një herë e kishte të thyer këmbën , por ashtu me këmbë të thyer i ka mundur në vrapim krejt brigadën.
 
"Gjatë karrierës sime të gjatë në ushtri, asnjëherë s`kam takuar oficere si Yllka, sepse ajo ka shumë pasion dhe vendosmëri. Rrallë ka femra dhe ushtare si togere Yllka Cana”, ka theksuar komandanti i saj.


(Në foto: Yllka Cana)

Redaksia Online
(mag/shqiptarja.com)