Pandemia e koronavirusit do t'i bëjë shqiptarët të presin më gjatë për një sinjal tjetër pozitiv për hapjen e negociatave. Përballimi i këtij virusi të padukshëm do të jetë në fokusin e Samiti të Zagrebit, që do të mblidhet online, pasditen e së mërkurës, tashmë i ridimensionuar.
Në axhendën e siguruar nga Report tv thuhet se udhëheqësit e vendeve pjesëmarrëse do të diskutojnë mbi menaxhimin e situatës nga COVID, masat, planin për të ardhmen, solidaritetin rajonal dhe më gjerë, por edhe ndihmën nga Brukseli për Ballkanin Perëndimor.
Ekspert i çështjeve të Integrimit, Gledis Gjipali, në një intervistë për Report tv sqaron se Shqipëria përveç kohës, do të humbasë dhe financiarisht.
![](https://shqiptarja.com/template/img/NO_ALFA_Kuadrate shqiptarja.png)
“Sigurisht humbasim kohë. Do të ketë një shtyrje të masave apo premtimeve që prisnin të merrnin Shqipëria dhe vendet e tjera të Ballkanit perëndimor, sidomos paketa financiare që kishte lidhje me metodologjinë e re të zgjerimit, tashmë është e pamundur të ndërmerret, për shkak të pandemisë dhe rifoksuit të Samitit”, thotë Gjipali.
Gledis Gjipali flet për një punë intensive që e pret Shqipërinë, ku do të nevojitet kontributi i të gjithëve.
“Nuk duhet të harrojmë që tashmë fillon procesi i integrimit të vërtetë. Do të jetë shumë intensiv, dhe kërkon një angazhim jo vetëm nga institucionet por edhe nga shoqëria shqiptare. Duhet të jemi pjesë e këtij procesi, duhet të jemi shumë aktivë. Nuk është vetëm detyrë e klasës politike. Sa më shpejt ta kuptojmë aq më shpejt do e kuptojmë që të angazhohemi”, shprehet Gjipali.
PO-ja e shumëpritur për vendin tonë nga BE u mor në morinë e lajmeve për koronavirusin, të infektuarit dhe viktimat. Tashmë rruga e Shqipërisë në plotësimin e ëndrrës europiane do të jetë më e gjatë.
![](https://shqiptarja.com/template/img/antipiracynote.jpg)
![](https://www.shqiptarja.com/template/img/sh_logo1.png)