Zbulohet plani i PS,më 30 nëntor
ikën Zguri, socialistët marrin KQZ

Report Tv ka zbuluar projektin e mazhorancës për datën 30 nëntor, ku do të mblidhet seanca plenare për miratimin e Buxhetit 2018. Para seancës, Report Tv mësoi se do të mblidhet Konferenca e Kryetarëve për të shkarkuar Klement Zgurin si kryetar dhe anëtar i KQZ, i akuzuar nga PS për shkelje të kodit zgjedhor dhe ligjit të dekriminalizimit.

Të njëjtat burime i thanë Report Tv se më 30 nëntor do të shpallet vakanca për kryetar të KQZ, si dhe hapet gara për kryetarin e ri. Ndërkohë, me anëtarin e ri të KQZ që do të zgjidhet si kryetar në vend të Zgurit PS merr shumicën edhe në këtë institucion. 

Partia Socialiste e akuzon Zgurin se ka shkelur ligjin e dekriminalizimit, pasi nuk i hoqi mandatin kryebashkiakut të Mallakastrës, Agron Kapllanaj, i cili rezulton i dënuar me dy vjet heqje lirie në Itali më 2004.

Pas kësaj, kreu i KQZ, i emëruar në kuadër të marrëveshjes politike të 18 majit mes Ramës dhe Bashës, ka humbur besimin e socialistëve. Më 30 nëntor do të shpallet vakanca për kryetarin e ri të KQZ, për zgjedhjen e të cilit do të ndiqen procedurat normale të parashikuara në ligj. 

d.c./shqiptarja.com

TAG:
• kqz