Rusia po përgatit një sulm masiv kundër infrastrukturës energjetike të Ukrainës.

Paralajmërimi vjen nga presidenti ukrainas, Volodymyr Zelensky në prag të bisedimeve me Rusinë në Gjenevë.

Zelensky denoncoi një sulm të fundit kundër objektivave të sektorit të energjisë në Ukrainë.

"Kjo tregon shumë për mënyrën se si Rusia i sheh përpjekjet diplomatike të partnerëve të saj", shkroi presidenti ukrainas në një postim në X pasi informoi udhëheqësit ushtarakë mbi situatën në front.

Zelensky beson se nevojitet presion i vazhdueshëm mbi Rusinë dhe se Ukrainës duhet t'i ofrohen garanci të qarta sigurie.

“Vetëm në këtë mënyrë, mund t'i jepet fund luftës së shkaktuar nga pushtimi rus i Ukrainës, i cili po hyn në vitin e katërt”, u shpreh ai.

Raundi i ri i bisedimeve midis Rusisë dhe Ukrainës me ndërmjetësimin e SHBA-ve do të zhvillohet në Gjenevë më 17-18 shkurt.

Kremlini deklaroi se në Gjenevë do të diskutohet edhe çështja e territoreve.

"Bisedimet në Gjenevë synojnë të diskutojnë një gamë më të gjerë temash, duke përfshirë, në fakt, çështjet kryesore që kanë të bëjnë si me territoret ashtu edhe me gjithçka tjetër", tha zëdhënësi i Kremlinit, Dmitry Peskov.

Më 4-5 shkurt, në Abu Dhabi u zhvillua raundi i dytë i negociatave trepalëshe midis Rusisë, Shteteve të Bashkuara dhe Ukrainës. Pas bisedimeve, i dërguari special i SHBA-së, Steve Witkoff, njoftoi se Moska dhe Kievi kishin rënë dakord të shkëmbenin 314 të burgosur lufte.

Raundi i parë i konsultimeve trepalëshe për sigurinë që përfshinin Rusinë, Ukrainën dhe Shtetet e Bashkuara u mbajt më 23-24 janar, gjithashtu në Abu Dhabi.

Takimet mes negociatorëve ukrainas dhe rusë kanë qenë të rralla që nga pushtimi në shkallë të plotë i Kremlinit në shkurt të vitit 2022.

Rendit zhvillimet sipas orarit:
Ora 17:05
Bisedimet në Gjenevë, Kremlini: Do të diskutohet edhe çështja e territoreve

1770984708_dmitrypeskov.jpg

Zëdhënësi i Kremlinit, Dmitry Peskov

Zëdhënësi i Kremlinit, Dmitry Peskov deklaroi se në Gjenevë, ku do të mbahet raundi i tretë i bisedimeve me Ukrainën, do të diskutohet edhe çështja e territoreve.

"Bisedimet në Gjenevë synojnë të diskutojnë një gamë më të gjerë temash, duke përfshirë, në fakt, çështjet kryesore që kanë të bëjnë si me territoret ashtu edhe me gjithçka tjetër", shpjegoi Peskov.

Për këtë arsye, sipas tij, e nevojshme Rusia të përfaqësohet nga Vladimir Medinsky, ndihmësi i presidentit rus, Vladimir Putin.

R.C/Shqiptarja.com

Ora 16:57
Rubio: Vetëm SHBA-të kanë arritur të fillojnë negociatat për luftën në Ukrainë

Foto: Marco Rubio

Shtetet e Bashkuara janë "i vetmi komb në botë" që ka arritur të bashkojë ukrainasit dhe rusët për negociata, deklaroi Sekretari i Shtetit i SHBA-së, Marco Rubio, në një konferencë për shtyp me Viktor Orban.

"Nuk jam këtu për të fyer askënd, por Kombet e Bashkuara nuk kanë qenë në gjendje ta bëjnë këtë, nuk ka asnjë vend tjetër në Evropë që ka qenë në gjendje ta bëjë këtë", tha ai, duke shtuar se Trump është "kritikuar" nga bashkësia ndërkombëtare për përpjekjet e tij për t'i dhënë fund luftës, në vend që të "duartrokitet".

Kjo luftë nuk duhej të kishte ndodhur kurrë. Kjo luftë nuk do të kishte ndodhur kurrë nëse Donald Trump do të kishte qenë president i Shteteve të Bashkuara kur ajo filloi", tha ai, duke shtuar se Uashingtoni "do të bëjë gjithçka që është e mundur për ta përfunduar atë".

Xh.K/Shqiptarja.com

Ora 16:34
Gjermania dhe Britania e Madhe paralajmërojnë europianët: Armatosuni kundër një sulmi të mundshëm rus

Foto: Flamuri i BE-së dhe i Rusisë

Udhëheqësit ushtarakë të Gjermanisë dhe Britanisë së Madhe kanë paralajmëruar europianët të armatosen për një sulm të mundshëm rus.

Moska po e zhvendos vazhdimisht vendosjen e saj ushtarake më në perëndim, shkruan Inspektori i Përgjithshëm i Bundeswehr-it, Carsten Breuer dhe Shefi i Shtabit të Forcave të Armatosura Britanike, Richard Knighton, në një deklaratë të botuar nga Welt dhe Guardian.

Forcat e armatosura ruse janë armatosur deri në atë pikë sa "rreziku i konfliktit me NATO-n mund të rritet", thuhet më tej në deklaratë.

Xh.K/Shqiptarja.com