Zgjedhjet lokale, KQZ zbraz kutitë
nis asgjesimin e fletëve të votimit

TIRANE- Komisioni Qendror i Zgjedhjeve hap kutitë e votimit të zgjedhje të fundit vendore të 21 qershorit 2015. Kryetarja e këtij institucioni, Lefterie Luzi ka ngritur grupin e punës që do të merret me këtë çështje. Kutitë e votimit të cilat ruhen në magazinën e KQZ-së në Lundër do të hapen nga administrata e KQZ-së, ku do të diferencohen materialet zgjedhore, pra procesverbalet dhe tabelat e rezultateve dhe fletët e votimit.

Sa u takon të parave, KQZ do të mbajë vetëm një kopje të procesverbaleve dhe të tabelave të rezultateve, ndërsa origjinalet do t’ia dërgojë Arkivit Qendror të Shtetit. Ndërkohë, kutitë e tjera, ato që mbajnë fletët e votimit, do të hapen dhe materialet do të asgjësohen. Mënyra e përdorur deri më tani për asgjësimin e tyre ka qenë djegia, dhe kjo pritet të përdoret edhe kësaj radhe. KQZ ka pajtuar punonjës shtesë me kontratë për kryerjen e këtij procesi, që i paraprin përgatitjes së KQZ-së për zgjedhjet e ardhshme parlamentare, të parashikuara për vitin 2017.   

 

TAG:
• kqz