Zgjedhjet në Kolonjë, përfundon 
shpërndarja e bazës materiale 

Bashkia e Kolonjës voton këtë dielë për të zgjedhur kryebashkiakun e ri. Përballë njëri-tjetrit në këtë garë janë Ilia Stefo i mazhorancës dhe Dritan Hajro i mbështetur nga opozita. Ndërkaq, Komisioni Qendror i Zgjedhjeve informon se gjithçka është gati dhe se ka përfunduar shpërndarja e të gjithë bazës materiale zgjedhore, në përputhje me të gjithë procedurat ligjore të përcaktuara në Kodin Zgjedhor dhe aktet e KQZ-së.

Sipas KQZ-së, baza materiale u mor në dorëzim nga 36 Komisionet e Qendrave të Votimit pranë KZAZ-së nr. 73, Kolonjë, dhe me tërheqjen e bazës së materialeve zgjedhore fillon faza e përgatitjes së Qendrave të Votimit.

Të gjithë Qendrat e Votimit duhet të jenë të hapura dhe të fillojë procesi i votimit në orën 07.00, të ditës së dielë.

Administrata e KQZ-së  në datat 16-18 nëntor ka trajnuar 112 komisionerë të Qendrave të Votimit nga 241 komisionerë në total, të cilët do të angazhohen ditën e votimit, pra ditën e nesërme.  Pjesa më e madhe e komisionerëve pjesëmarrës në trajnim ishin të propozuar nga Partia Socialiste dhe Lëvizja Socialiste për Integrim.

Sot,  Administrata e KQZ-së ka trajnuar edhe 72 kryetarët dhe sekretarët  e Komisioneve të Qendrave të Votimit të cilët janë paraqitur për të tërhequr bazën materiale, pavarësisht pjesëmarrjes së tyre në trajnimin e zhvilluar në datat 16-18 nëntor.

KQZ bën me dije gjithashtu se gjatë ditës së sotme ka patur kërkesa për zëvëndësim të komisionerëve, përkatësisht:
1.     Partia Socialiste ka kërkuar 12 zëvëndësime
2.     Lëvizja Socialiste për Integrim ka kërkuar 15 zëvëndësime
3.     Partia Demokratike kë kërkuar 8 zëvëndësime
4.     Partia Republikane ka kërkuar 4 zëvëndësime
 
KQZ sqaron se administrata e saj ndodhet në Kolonjë për të monitoruar dhe ofruar asistencën e nevojshme për komisionet e niveleve të dyta dhe të treta, ndërkohë të gjithë sekretarët e qendrave të votimit duhet të komunikojnë në mënyrë të vazhdueshme me KQZ-në, për të përcjellë informacionin në dinamikë për ecurinë e procesit të votimit.

Redaksia Online
l.q/Shqiptarja.com

TAG:
• kqz