Zgjedhjet në PD, Basha nis zyrtarisht fushatën nga Kruja: S’ka vend në organet vendimmarrëse të partisë për non gratat

TIRANË-  Pak ditë pasi dorëzoi zyrtarisht kërkesën për të kandiduar për kryetar i Partisë Demokratike, Lulzim Basha sot ka nisur zyrtarisht fushatën. Nga Kruja, ish-kryedmokrati i cili synon të rikthehet që të marrë drejtimin e PD-së pas më shumë se 1 viti që kur dha dorëheqjen, ka kërkuar mbështetjen e demokratëve për të drejtuar këtë parti në një kohë të vështirë dhe sfiduese.

Në mesazhin e tij shkruar në rrjetet sociale, Basha rikonfimon edhe një herë mesazhin për Sali Berishën, duke nënvizuar se nuk ka vend në organet vendimmarrëse të PD-së për këdo, lider, ish-lider, lider i ardhshëm, i cili shpallet non grata nga SHBA.

‘Është nder dhe respekt i jashtëzakonshëm ta filloj këtë proces brenda familjes sonë politike nga Kruja, simbol i qëndresës, i krenarisë, i bashkimit. Jam para jush për të kërkuar mbështëtjen tuaj për të drejtuar Partinë Demokratike në një kohë të vështirë dhe sfiduese.

LEXO EDHE:
Ylli Pata: E marta e kiametit...

Partia Demokratike nuk është e imja, as e ndonjë individi tjetër, por është e demokratëve, të cilët e kanë mbrojtur atë në ditë të vështira e pas çdo sfide i’a kanë dalë ta bëjnë atë edhe më të fortë. Jam i bindur se kështu do të ndodhë sërish, sepse këtë presin prej nesh shumica e shqiptarëve.

Jemi përballur me një fushatë në kufijtë e një lufte civile, me një arsenal mjetesh nga më të pistat, metodash nga më të ultat, për ta detyrur PD të futet në një konflikt me SHBA, për ta detyruar PD të bëhet mburojë e problemit personal të një individi.

Ajo që sot është e sanksionuar në ligjet e PD dhe që dua ta rikonfirmoj edhe njëherë është se nuk ka vend në organet vendimmarrëse të Partisë Demokratike për këdo, lider, ish-lider, lider i ardhshëm, i cili shpallet non grata nga SHBA.

Ajo që është e rëndësishme për sot dhe të ardhmen e PD është se ajo do t’i mbetet besnike vlerave euroatlantike dhe interesave kombëtare.

Ne do të bëjmë një lidhje me të djathtën historike, me dyert e mëdha që hodhën themelet e shtetit shqiptar, me njerzit e lirë dhe demokratë që ishin radha e parë e persekutimit komunist, me kontribuesit pas viteve ’90, të të gjithë të përjashtuarve dhe viktimave politike gjatë këtyre 30 viteve, që të ndërtojmë së bashku një histori të plotë të Partisë Demokratike.

Demokracia pjesëmarrëse, përfshirja e gjerë e anëtarëve të partisë, e qytetarëve, e intelektualëve, e grave, e sipërmarrësve dhe grupeve të interesit në ndërtimin e alternativës më të mirë.

Aleanca Qytetare për Demokracinë, do të jetë koalicioni ynë për ta çliruar ekonominë dhe për t’i çuar përpara ndryshimet kushtetuese, që do të çbëjnë ato të 2008-ës, do të mundësojmë listat e hapura, vetting-un e politikanëve, votën e diasporës dhe kufizimin e mandateteve.

Sot ky është një mision i ri, ndoshta më i rëndësishmi që nga krijimi i kësaj partie.

Partia Demokratike do të jetë e të gjithë demokratëve, nga themelusit te më i riu, apo më e reja mes nesh. Një parti moderne, që pasqyron shoqërinë dhe nevojat e saj, me të rinj e të reja, me profesionistë të ndershëm që duan vendin e tyre. Ky është modeli që duhet t'u japim shqiptarëve, si shembull i një ndryshimi që po ndërmarrim për të ndryshuar politikën e vendit.’- shkruan Basha.

Lulzim Basha dhe i vetmi kandidat përballë tij, Gjergji Hani tashmë kanë nisur fushatën për të bindur demokratët për t’i besuar, të parit për të disatën herë, drejtimin e partisë. Fushata do të zgjasë nga 24 qershori deri më 27 korrik, siç vendosi mes debateve kryesia e PD-së në mbledhjen gati 10 orëshe. Fushata e dy kandidatëve do të shtrihet në dy rrafshe, debatet me praninë mediatike dhe takimet e mbyllura.  Fushata, do të përfshijë të paktën 6 debate të 2 kandidatëve përballë njëri-tjetrit. Zgjedhjet për kreun e ri të PD-së do të mbahen më 29 korrik.

M.Q./Shqiptarja.com

TAG:
• PD
• lulzim basha
• PD zgjedh kryetarin e ri