Zgjedhjet vendore, Meta i mbyll derën Alibeajt: I kemi lënë në dorë Berishës të zgjedhë kandidatët më të mirë

TIRANË- Ilir Meta dhe Sali Berisha kanë nisur bashkëpunimin për zgjedhjet vendore 2023. Pas takimit në selinë e Partisë Demokratike me Sali Berishën, kreu i Partisë së Lirisë tha se i kanë lënë në dorë Berishës që të zgjedhë kandidatët më të mirë me të cilët do të dalin në zgjedhje. Meta tha se është e rëndësishme që e gjithë opozita e vërtetë të dalë me një kandidat të përbashkët në këto zgjedhje, pasi kjo është e vetmja mënyrë për të përmbysur regjimin mafioz

“Partia e Lirisë siç e dini është e hapur për të bashkëpunuar më çdo faktor të vërtetë opozitar në radhë të parë me PD në interes të vendosjes së demokracisë sa më shpejt në vend. Së dyti Partia e Lirisë ka qenë dhe është e gatshme të bashkëpunojë dhe koordinojë aksionin opozitar si një interes kombëtar dhe jo interes partiak. Partia e Lirisë  e ka përballjen me Edi Ramën dhe regjimin mafioz dhe dëshiron ti bashkojë forcat në mënyrën më të hapur me të gjithë forcat e tjera që janë realisht në opozitë me Edi Ramën”, tha Meta.

Ndonëse kanë si synim të sigurojnë shumicën në Këshillat Bashkiakë, Meta tha se nëse dikush nga Partia e Lirisë propozon që të kandidojë për kryebashkiak se mendon se ka mbështetje në një bashki të caktuar, do të ulen në bisedime me Berishën dhe do të arrijnë një dakordësi.

Sa i takon kandidatëve, është e rëndësishëm të ketë vetëm një në çdo bashki. Në kushte te tjera mund të kishte 2-3 ose 4. Në këtë drejtim e kemi bërë të qartë që s’do vëmë kushte për asnjë lloj bashkie. Nëse do të ketë kandidat nga PL që mendojnë se kanë përkrahje në një bashki të caktuar është një çështje që do e diskutojmë që ky kandidat të testohet. (...) Kemi kërkuar që PD të marrë përgjegjësinë për përzgjedhjen e kandidatëve më të mirë.- tha Meta. 

Meta i mbylli derën e bashkëpunimit grupit të Enkelejd Alibeajt. Meta tha për gazetaren e Report TV, Danjela Maloku se do të bisedojë vetëm me opozitën e vërtetë dhe jo me opozitën me regji, që hiqet sikur bën opozitarizëm.

Rendit zhvillimet sipas orarit:

Të Fundit Të Parat

SI.E./G.MO/Shqiptarja.com

TAG:
• zgjedhjet vendore 2023
• enkelejd alibeaj
• sali berisha
• Ilir Meta