Interpelancat po trajtohen me dy standarde, tha Ina Zhupa nga podiumi i parlamentit. Sipas saj, ministrat njoftohen për interpelancat dhe ato përshtaten sipas axhendës së tyre, ndërsa kur deputetët mungojnë, përfshihen që më pas të quhen të realizuara.

“Sa herë që ne vendosim interpelanca, stafi i Kuvendit kujdeset që të lajmërojë ministrat, të shikojë axhendën dhe nëse s’janë s’i vendos fare në rendin e ditës. Ka njëfare logjike, por kur deputetëve të opozitës iu vjen radha për interpelancën nuk pyesni janë apo nuk janë, por e vendosni në rendin e ditës për ta quajtur të ezauruar. Nuk ka kuptim që interpelanca që i mbani nga 2 muaj e fusni në të vetmen seancë që ne s’jemi këtu. I keni bërë deputetët me dy standarde, disa pyeten, disa dëgjohen, disave u futen ligjet sa i dorëzojnë, me procedurë të përshoejtuar. Nuk ka korsi të ndryshme se nuk është as në rregullore, as në Kushtetuë. Ne s’po kërkojmë asgjë dhe asnjë privilegj që do na e jepni ju, vetmë zbatimin e Kushtetutës”, tha Zhupa.

Më pas, deputetja ngriti çështjen e Komisionit të Reformës Territoriale për të cilin pati kundërshtim për dorëzimin e draftit kur s’është mbyllur puna. Më pas, u bëri thirrje deputetëve të Vlorës që të mos votojnë shkrirjen e bashkive Delvinë dhe Konispol.

“Është e padëgjuar që një komision të mos arrijë dot të mos mbyllë as pikën e parë të planit të punës dhe të dorëzojë draftin. Po pse i bëtë ato dëgjesa? Nuk kemi thënë të shkrihen bashkitë. T’ju vijë turp nëse votoni që të shkrihet Delvina dhe Konispoli! T’ju vijë turp nëse ju jepni vota që të shkrihen dy nga bashkitë identitare të jugut!”, tha Zhupa.


Lajmi kryesor:

‘Territorialja’/ PD akuza PS: Të vetëm drejt hartës së re, doni të zhdukni 20 bashki! Balla: Sillni draftin deri të enjten