Zjarret, 4 vatra aktive/ Plagoset gjatë operacionit ushtari në Mirditë, dërgohet te 'Trauma'! Përmirësohet situata në Gojan të Pukës, rikthehen banorët e evakuuar! (VIDEO)

Ushtari 28-vjeçar Andrea Kaçi, i cili u plagos gjatë aksionit për shuarjen e flakëve në Mirditë, është vizituar në spitalin e Traumës në Tiranë nga ministri i Mbrojtjes, Ermal Nufi dhe Shefi i Shtabit të Përgjithshëm të Forcave të Armatosura, Arben Kingji.

Report Tv ka siguruar pamjet kur ministri Ermal Nufi ka dalë nga spitali i Traumës, pasi vizitoi ushtarakun e plagosur.

Menjëherë pas dëmtimit gjatë furnizimit me ujë të një mjeti zjarrfikës, 28-vjeçari u transportua me urgjencë me helikopter drejt Spitalit të Traumës në Tiranë.

Njoftimi i Ministrisë së Mbrojtjes:

Në operacionin e Forcave të Armatosura në Mirditë për shuarjen e zjarreve, një prej efektivëve A. K. është dëmtuar gjatë procesit të furnizimit me ujë të mjetit zjarrfikës.

Efektivi i lënduar është transportuar me helikopter drejt Spitalit të Traumës, në Tiranë, ku po merr aktualisht trajtimin e nevojshëm mjekësor.

Efektivi i FA po ndiqet nga mjeku neurokirurg dhe ndodhet jashtë rrezikut për jetën.

Gjatë qëndrimit në Spitalin e Traumës, efektivi është vizituar nga Ministri i Mbrojtjes, Ermal Nufi dhe Shefi i Shtabit të Përgjithshëm të FA, Gjenerallejtënant Arben Kingji, të cilët janë interesuar menjëherë nga afër për gjendjen e tij shëndetësore.

Ministria e Mbrojtjes vijon të ndjekë nga afër gjendjen shëndetësore të efektivit dhe t’i qëndrojë pranë në këtë situatë.

Report Tv ka siguruar pamjet e transportimit me helikopter drejt Spitalit të Traumës në Tiranë, të ushtarit të plagosur gjatë operacioneve për shuarjen e flakëve në Mirditë.

28-vjeçari Andrea Kaçi u plagos teksa po furnizohej me ujë një automjet zjarrfikës që po merrte pjesë në operacionin për shuarjen e flakëve që kishin përfshirë fshatin Tenë dhe disa zona të tjerë.

Gjatë procesit, ka plasur tubi me diametër 120 milimetra, i pajisur me kokë metalike. Presioni ka shkëputur pjesën metalike, e cila ka goditur ushtarin, duke i shkaktuar dëmtime.

Vatrat e zjarrit që kanë mbetur duket se nuk janë më rrezik për fshatin Gojan i Madh të Pukës, në hyrjen e të cilit vijojnë të jenë të dislokuara ende disa mjete zjarrëfikese.

Në brendësi të Gojanit situata duket e qetë, teksa gjurmët e një dite më parë janë të dukshme në çdo kënd të fshatit.

Disa nga familjet e evakuara i janë rikthyer banesave, një ndër ta dhe ajo e Pjetër Ndoit në lagjen Pepaj në fshatin Gojan.

Pjetri dhe bashkëshortja e tij tregojnë për Report Tv tmerrin që përjetuan një ditë më parë, teksa i gëzohen faktit se kanë ende një strehë mbi kokë.

“Situatë e jashtëzakonshme. Luftë e pashpallur. Luftë e pashpallur ka qenë që ditën e diel. Zjarri ja kalon edhe luftës. Mos të shpëtonin këto shtëpi, ka qenë një minus i jashtëzakonshëm. Jo nga ana ekonomike, por nga ana morale, logjike e shpirtërore”, tha Pjeter Ndoi, banorë i fshatit Gojan.

“Ishte situatë shumë e frikshme. Veç me ik me shpëtu me familjen. Mbrëmë nuk kemi qëndruar këtu. S’jemi të sigurt”, tha bashkëshortja e tij.

Ndërkoh që situata me flakët në fshatin Gojan duket më e qetë zjarret vijojnë ende te jenë aktive në pyjet pranë fshatrave Prozhëm e Rrape ku është e pa mundur ndërhyrja e mjetevr zjarrëfikës, teksa forcat e angazhuara në terren po punojnë me mjete rrethanore.

Prej rreth dy javësh zjarret në pyjet e Pukës kanë përshkuar rreth 3000 hektarë shkurre e pyje te lartë pishe, një pjesë e të cilëve u dogjën plotësisht duke rrezikuar dy ditet e fundit dhe jetë njerëzish.

Një ushtar i Forcave të Armatosura është plagosur në Mirditë, teksa po furnizohej me ujë një automjet zjarrfikës që po merr pjesë në operacionin për shuarjen e zjarreve.

Gjatë procesit, ka plasur tubi me diametër 120 milimetra, i pajisur me kokë metalike. Presioni ka shkëputur pjesën metalike, e cila ka goditur 28 vjeçarin Andrea Kaçi, duke i shkaktuar dëmtime.

Pas incidentit ai është dërguar te Trauma dhe ndodhet jashtë rrezikut për jetën.

Një zjarr ka përfshirë pyllin me pisha në zonën e Pishporos, në territorin e Njësisë Administrative Novoselë, Vlorë.

Flakët janë përhapur në sipërfaqen e pyllëzuar, duke rrezikuar masivin me pisha. Ende nuk dihen përmasat e sakta të zonës së përfshirë nga zjarri dhe nëse ka rrezik për banesat apo zonat e banuara pranë saj.

Forcat zjarrfikëse pritet të ndërhyjnë për të vënë nën kontroll flakët dhe për të parandaluar përhapjen e mëtejshme të zjarrit.

Një vatër zjarri është evidentuar në zonën e Kagjinasit, në Ersekë.

Pas marrjes së njoftimit, drejt vendngjarjes janë nisur menjëherë dy mjete zjarrfikëse. Aktualisht po punohet për vënien nën kontroll dhe shuarjen e flakëve.

Vatra e zjarrit fillimisht mendohet të ketë nisur në varrezat e fshatit ndërsa nga flakët është përfshirë edhe një sipërfaqe toke.

Administratori apostolik i dioqezës së Sapës, Atë Mariano Tarantino shprehu keqardhje që malet e vendit tonë janë bërë shkrumb e hi si pasojë e pakujdesisë.

Në veçanti ai theksoi edhe situatën e vështirë në Gojan të Pukës, ku disa shtëpi janë djegur.

Në mesazhin e tij ai bëri thirrje që të gjithë qytetarët të kujdesen për mjedisin dhe të mos vënë zjarre.

 “Si kishë katolike po ndjekim situatën e zjarreve në mënyrë të veçantë në Gojan të Pukës, ku zjarri ka djegur edhe përpirë çdo gjë. Malet e Shqipërsië janë bërë shkrumb e hi për shkak të pakujdesisë sonë. Një falenderim shkon për të gjithë ata që kanë fikur zjarret.  Ne duhet të jemi më të kujdesshëm në ruajtjen e mjedisit, kjo është përgjegjësia e të gjithëve”,tha ai.

Zjarri i përmasave të mëdha që përfshiu zonën e Dukatit dhe malin e Çikës është vënë nën kontroll nga forcat zjarrfikëse.

Pavarësisht neutralizimit të flakëve, zjarrfikësit vijojnë punën në terren, në një zonë të vështirë malore, me qëllim shmangien e riaktivizimit të vatrave nga era dhe parandalimin e rindezjes së zjarrit.

Zjarri, i cili prej më shumë se dy ditësh përfshiu këtë zonë, dogji një sipërfaqe të konsiderueshme me shkurre dhe pisha, ndërsa ndërhyrja e forcave në terren vijon për të eliminuar çdo rrezik të mundshëm të rindezjes.