Zjarri në Karbunarë, digjen 100 hektarë ullinj, banorët: Dëmi është i madh për herë të dytë

LUSHNJE - Flakët që përfshinë një sipërfaqe të madhe kodrinore në Karbunarë të Lushnjes mbrëmjen e djeshme (11 shtator) la pasoja katastrofale për fermerët.

Zjarri i shuar vetëm në orët e para të mëngjesit të sotëm ka djegur plotësisht 100 hektarë ullinj.

80 përqind e sipërfaqes së djegur ishin me ullinj disa vjeçarë dhe ishin në prag të vjeljes së prodhimit të ri.

Zjarrëfikëset, Policia e Shtetit dhe Policia Bashkiake si dhe banorët e zonës u angazhuan për shuarjen e flakëve dhe të shpëtonin çfarë të mundnin.

Terreni kodrinor e ka bërë të pamundur futjen në zonë të mjeteve të zjarrëfikëses.

Fermerët shprehen të shokuar nga dëmet e këtij zjarri i cili për herë të dytë brenda pak ditësh u ka shkatërruar të mbjellat.

Ata thonë se dëmi i shkaktuar është kolosal dhe arrin shifrën e 4-5 mln lekësh.

Veç të tjerave fermerët shprehen se një ndër shkaqet e përshkallëzimit të zjarrit ishte mungesa e rrugëve në plantacionet me ullinj ku jo në pak raste janë zënë nga vetë fermerët.

I.K/Shqiptarja.com

TAG:
• ullishte
• flaket e zjarrit
• zjarri lushnje