Zyrat e MUP-së serbe në veri mund
të kenë ndërruar vetëm lokacionet

MITROVICE -  Mbyllja e 11 zyrave të Ministrisë së Punëve të Brendshme të Serbisë (MUP) në të gjithë territorin e Mitrovicës veriore, mbetet ende e pasigurtë.

Informatat për mbylljen e stacioneve të MUP-it në veri janë përshëndetur në Mitrovicë, mirëpo dyshohet se këto struktura mund t’i kenë ndërruar vetëm lokacionet.

Zyrtarët komunalë të Mitrovicës e kanë mirëpritur lajmin për mbylljen e stacioneve të MUP-it në veri, por kanë kërkuar që të verifikohen mirë këta hapa.

Për këtë çështje u diskutua sot në takimin e Komitetit lokal për siguri publike, ku drejtori për Mbrojtje dhe Shpëtim, Behxhet Bala, tha se organet e rendit duhet të hetojnë dyshimet e qytetarëve shqiptarë të veriut se MUP-it vetëm mund t’i ketë ndërruar lokacionet.

”Nëpërmes medieve kemi dëgjuar se janë mbyllur të gjitha zyrat e MUP-it që kanë funksionuar në pjesën veriore, si duket ata zyrat i kanë mbyllur miro i kanë ndërruar lokacionin, duhet të kemi shumë kujdes meqë sipas disa informacioneve te pjesës veriore thuhet se ata tani janë duke funksionuar nëpër shtëpi private”, theksoi ai, informon RTK.

Ndryshe drejtuesit e Komunës së Mitrovicës vlerësuan, se java e fundit në veri është përshkuar me disa incidente, të cilat e kanë mbajtur situatën të tensionuar. Nënkryetari i komunës, Riza Haziri, u fokusua pikërisht në çështjen e rindërtimit.

”I kemi njoftuar KFOR-in, Policinë e Kosovës dhe EULEX-in se punët duhet të vazhdojë për faktin se njerëzit më nuk mund të qëndrojnë dhe komuna nuk ka mundësi tu gjej zgjidhje tjetër, dhe nuk ka kursyer të kërkohet zgjidhje tjetër kur njerëzit i kanë pronat atyre. Kërkojmë që të pengohen këta ekstremist dhe të krijohet siguri për të vazhduar punët”, tha ai.

Zyrtarët komunalë kërkuan nga strukturat e sigurisë që të marrin masa për të krijuar një ambient të qetë, në mënyrë që të gjithë të mund të kthehen në pronat e tyre.

 Në 19 qershor, burimet zyrtare qeveritare kosovare bënin të ditur se në Bruksel në raundin e katërt të bisedimeve teknike për zbatimin e marrëveshjes për normalizimin e marrëdhënieve ndërshtetërore midis Republikës së Kosovës dhe Serbisë,  fillimisht në fushën e sigurisë pala serbe ka dorëzuar listën e stacioneve të policisë se ku janë të vendosura policia ilegale. Pas mbylljes së lokacionit në Leposaviç u premtua se do të vazhdohet me mbylljet e tjera.

(sg/rtk/shqiptarja.com)