Zyrtare/ Erling Haaland rinovon me Man. Cityn deri në vitin 2034, kontratë rekord dhe pagë e majme

Erling Haaland nuk shkëlqen vetëm në fushë, por edhe në zyra. Sulmuesi dhe Manchester City kanë rinovuar kontratën deri në verën e 2034. Kjo është kontrata më e gjatë e firmosur ndonjëherë në futboll, me norvegjezin që është lidhur me "Qytetarët" edhe për nëntë vite e gjysmë.

24-vjeçari u bashkua me Cityn në verën e 2022 nga Dortmund dhe është kthyer në liderin e ekipit me paraqitjet dhe golat e tij. Në këto sezone Haaland ka fituar gjashtë trofe, shumë tituj individualë dhe me 36 golat e tij u shpall golashënuesi më i mirë në sezonin 2022-23 në Premier League.

Padyshim norvegjezi është në listën e lojtarëve më të mirë në botë, teksa pritet që vitet që vijnë të jetë i nominuar edhe në listën e ngushtë të "Topit të Artë".

I lumtur është shprehur sulmuesi pas firmës së re, ndërsa ka falenderime. Sipas The Athletic të gjitha klauzolat e mëparshme të largimit bien dhe do ketë shifra të reja, ndërsa firma në kontratë ka ardhur edhe me një përmirësim të ndjeshëm page.

“Jam vërtet i lumtur që kam nënshkruar kontratën time të re dhe që jam në gjendje të pres të kaloj edhe më shumë kohë në këtë klub të madh. Manchester City është një klub i veçantë, plot me njerëz fantastikë, me mbështetës të mahnitshëm. Ky është lloji i ambientit që ndihmon të marrjen e më të mirës nga të gjithë.

Unë gjithashtu dua të falënderoj Pep, stafin e tij trajnues, shokët e mi të skuadrës dhe të gjithë në klub, pasi të gjithë më kanë ndihmuar aq shumë në dy vitet e fundit. Ata e kanë bërë këtë një klub kaq të veçantë për të luajtur futboll. Tani edhe unë jam Manchester City, pavarësisht gjithçkaje.

Dua të vazhdoj të zhvillohem, të vazhdoj të punoj për t’u përmirësuar dhe të shikoj si të bëj më të mirën time për të provuar dhe ndihmuar të arrijmë më shumë suksese", tha Haaland.

Epo sulmuesi do jetë 34 vjeç kur t'i skadojë kontrata e firmosur sot dhe nëse ndonjë klub nuk "çmendet" për ta blerë me shifra të majme, Haaland do e përfundojë karrierën te Man. City.

 

S.Dh/Shqiptarja.com

TAG:
• Erling Haaland
• Manchester City
• premier league