Rejmona Baholli, studente e sapo diplomuar për Planifikim Urban, ushtron një profesion që është shumë larg degës që ajo ka mbaruar. Shpesh herë është në dilemë sesi do të jetë e ardhmja, por një gjë është e sigurt: Nuk dëshiron të largohet nga Shqipëria, edhe pse ka lindur në Firence. Dëshiron që potencialin dhe kontributin e saj ta japë në atdhe. Gjithnjë ka spikatur për durimin, kreativitetin, natyrën detajiste dhe të kujdesshme. Hobi i saj për të realizuar punime me dorë është shndërruar në një profesion të mirfilltë. Dëshira për të sjellë risi e shtyu të renë të krijonte portrete me gurë, shishe të personalizuara, termusë për t’i bërë të afëmve dhurata të veçanta. Në një ditë të zakonshme përpiqet të ndihmojë sadopak edhe prindërit me punën e tyre duke i orientuar drej marketingut dixhital. Pjesën tjetër të ditës e kalon duke punuar me orë të tëra në punishten e saj.