Çahet dhe shembet asfalti i rrugës Berat-Sinjë, bashkia: Të shmangen lëvizjet e panevojshme drejt fshatit deri në përmirësim e situatës

11 Dhjetor 2021, 21:21 | Përditesimi: 11 Dhjetor 2021, 21:21

Rruga e asfaltuar Berat-Sinjë ka pësuar shkarje dhe dëmtim të theksuar të asfaltit në krahun e majtë në ngjitje drejt zonës malore të Sinjës. Asfalti ka rrëshqitur dhe është rrëzuar rreth 3 km në hyrje të fshatit Sinjë, duke përbërë rrezik serioz për automjetet që qarkullojnë në këtë rrugë. Pamundësia për të ndërhyrë për shkak të errësirës dhe reshjeve të shiut ka detyruar bashkinë e Beratit që të rrethojë zonën e shembur dhe të vendosi në të dyja anët e saj, në hyrje dhe në dalje të Sinjës, tabela sinjalizuese për uljen e shpejtësisë dhe rrezikun që u kanoset drejtuesve të mjeteve në këtë pjesë të rrugës Bashkia e Beratit u ka bërë apel drejtuesve të mjeteve që të shmangin e kufizojnë lëvizjet e panevojshme drejt zonës malore të Sinjës, deri sa situata të përmirësohet dhe rrëshqitja e rrugës të ndalet. Burimet zyrtare të bashkisë Berat bëjnë me dije se, pas pastrimit të rrugëve nga gurët tashmë janë të kalueshme edhe rrugët drejt fshatrave malore: Karkanjoz, Bogdan,Qafë Dardhë dhe Mbolan.

 

r.k./Shqiptarja.com