Ndue Prendi, kishte vdekur në burg, një ditë shkurti të vitit 1954, ndërsa xhelatët e torturonin për ti nxjerrë informata rreth të vëllait dom Zef Oroshit, që kishte mundur të arratiset për në Jugosllavi. Por Ndoi, vëllai i vogël i priftit të arratisur s’kishte nxjerrë asnjë të dhënë që ju vlente. Pas më shumë se një viti nën tortura të tmerrshme kishte dhënë shpirt në një birucë të errët në Shkodër. Ndërkohë, Zef Oroshi kishte mbërritur në Itali dhe kishte intensifikuar luftën e tij ndaj regjimit komunist. Por aktiviteti i tij do të survejohej në çdo hap nga Sigurimi i Shtetit edhe atje në emigrim.