Anëtarët e Komisionit të Rithemelimit e mbështetësit e Berishës kanë organizuar militantët nga gjithë vendi për t'ju bashkuar protestës para selisë së PD. Por edhe pse po organizohet nga mbështetësit e PD, në dukje protestuesit e Berishës nuk po vijnë të organizuar, por, siç mëson Report TV, transporti po kryhet me automjete private.
Mësohet se nga Durrësi pritet të nisen rreth 1200-1500 militantë të PD. Sakaq burimet pranë policisë bëjnë me dije se nuk ka masa të shtuara në Durrës, por do të jenë postoblloqet e zakonshme pranë mbikalimit të Shkozetit dhe në autostradë, të cilat ushtrojnë kontrolle tek automjetet përgjithësisht luksoze, me targa të huaja, apo tek ato të cilat duken të dyshimta.
Në Fier, deputeti Luan Baçi ka organizuar militantët e Berishës, por bie në sy numri i vogël i tyre. Para nisjes, Baçi tha se nuk do të hyhet me dhunë në selinë e PD.
Nga Qarku i Gjirokastrës janë nisur 250 demokratë për të marrë pjesë në protestë, po ashtu në udhëtime private të organizuara nga vetë militantët.
Nga Kruja bëhet me dije se janë nisur drejt Tiranës 500 persona.
Në Vlorë, kryetari i PD Vlorë, Genc Deromemaj thotë se në drejtim të kryeqytetit janë nisur rreth 1000 demokratë. Pjesa më e madhe e tyre janë nisur me automjete private dhe në organizime individuale ndërsa katër njësitë administrative të Vlorës janë bashkuar duke vënë në dispozicion të demokratëve një autobusë dhe dy furgona për tu nisur në drejtim të Tiranës. Çdokujt prej tyre i është kërkuar të kenë me vete kartën e anëtarësisë.
Mësohet se nga Korça janë nisur rreth 1000 demokratë, ndërsa transporti u mundësua me mjete private. Atyre iu është kërkuar të kenë edhe kartën e anëtarësisë me vete.
