'Parajsa e vogël e Ballkanit'/ Tirana në optikën e revistës franceze 'Marie Claire'

Tirana konsiderohet nga francezët si "parajsa e vogël e Ballkanit", që ia vlen me patjetër të vizitohet.Revista e njohur franceze “Marie Claire” e cilëson Shqipërinë si vendin e shqiponjave që shfaqet si një vend plot magji, histori dhe kulturë, ndërsa Tiranën e përshkruan si "një qytet që nuk fle kurrë".

Duke cituar të dhënat e marra nga “Numbeo”, një nga faqet më serioze në fushën e statistikave, revista franceze e rendit kryeqytetin shqiptar si një ndër vendet më të sigurta në botë.“Shqipëria është një vend i cili është ende në hapat e para me një realitet në zhvillim e sipër”, shkruan më tutje “Marie Claire”.

Një fakt i tillë konfirmohet edhe nga Nicolas Coupat, një francez i cili punon në një agjenci që merret me organizimin e grupeve turistike nga Franca, të cilët duke përfituar nga ofertat joshëse që ofron vendi ynë, marrin edhe shërbimin dentar.

 "Unë jetoj në Shqipëri prej shumë vitesh dhe ajo që kam konstatuar është se Tirana është më e sigurt se Parisi apo qytete të tjera franceze. Këtu, unë mund të dal natën pa ndonjë rrezik. Ajo që më bëri të vendosem në Shqipëri është cilësia e jetës: Tirana është një qytet me plot mundësi argëtimi dhe vende ku mund të konsumosh një peshk të freskët, në restorante për më pak se 10 euro personi. Në Francë unë jetoja me një pagë prej 4500 eurosh, por kam vendosur të vij e të jetoj në Tiranë, ku me 1000 euro në muaj, bëj një jetë më të mirë. I ftoj qytetarët francezë, për të vizituar këtë vend të mrekullueshëm", shprehet Nicolas për revistën “Marie Claire”.

Artikulli i "Marie Claire" ku flitet për Tiranën 

/r.k./Shqiptarja.com

TAG:
• Tirane
• revista franceze Marie Claire
• Nicolas Coupat
• Numbeo