Unaza e Madhe/ Tension në Laprakë, policia nxjerr familjen, IMT shemb banesën (VIDEO)

Brenda pak minutave punonjësit e IMT kanë shembur me fadroma banesën dykatëshe në Laprakë, ndërsa deputeti i Klevis Balliu bëri thirrje për protesta në orën 15:00 në Shkozë dhe në 17:00 në ‘Astir’ si cdo ditë në muajin e fundit.

Pas protestave të dhunshme në Francë, qeveria vendosi pezullimin e vendimit për rritjen e taksës së karburantit. Deputeti i PD, Klevis Balliu u bën thirrje qytetarëve shqiptarë që të marrin shembull nga francezët dhe të vijojnë protestat. “E patë se çfarë ndodhi në Francë dhe në fund fituan. Ftoj qytetarët të marrin shembull nga Franca nga vëllezërit dhe motrat tona europiane. Ky është atentat që u bëhet këtyre banorëve. Do të vijojmë protestën edhe sot për këta qytetarë. Mbështetja jonë do të vijojnë kundër një banditi si Rama dhe Veliaj. Ai po nuk hapi veshët, do i trokasin te dera atij’ tha Balliu.

Zonja e shtëpisë në Laprakë që u shemb sot nga IMT u shpreh për mediat se kërkoi tre ditë kohë për të lëvizur orenditë, por u refuzua. “I kërkova tre ditë kohë për të lëvizur gjërat dhe për të kryer procedurat ligjore. Nuk e di si shteti vepron këtu. Është dhunë psikologjike” tha ajo.

Report Tv mëson se Bajram Nela nuk jetonte vetë në banesë, pasi katin e parë e kishte dhënë për biznes, po ashtu edhe katin e dytë për banim. Personat që jetonin në katin e dytë me qira janë larguar sot. Familja Nela nuk jetonte në këtë banesë. Ndërkohë që banesa është rrëzuar nga IMT brenda pak sekondash.

E ndërsa IMT vijon prishjen e banesës, zonja e shtëpisë është konfliktuar me policinë duke e kundërshtuar vendimin.

Policia futet në banesën dykatëshe dhe nxjerr me forcë familjen, nis shembja e shtëpisë në Laprakë, zonjës së shtëpisë i bie të fikët, ndërsa pas ndihmës së parë nga banorët gjendja shëndetësore u stabilizua.

Pronari i banesës në Laprakë, Bajram Nela shprehet se është njoftuar vetëm dje se banesa nuk legalizohet, ndërsa shton se vendimin e ka ankimuar dhe se nuk do të heqë dorë deri në një vendim të formës së prerë. Ai thotë se nuk do të dalë nga banesa dhe se do të vetëflijohet nëse IMT ndërhynë.

“Nuk kam dijeni, dje më erdhi njoftimi se nuk legalizohet. Dokumentet i kam dorëzuar në 2005, por dje më erdhi përgjigja se nuk legalizohet. Dua përgjigjen origjinale, pasi shteti erdhi për të më prishur shtëpinë me një fotokopje, që nuk ka vlerë ligjore, do ta hedh në gjyq projektin. Shteti erdhi pa ligj për të më prishur shtëpinë. Bëra një ankimim kundër skualifikimit për legalizim.

Pasi edhe njoftimi thotë se ke 30 ditë afat për ankimim. Kur vendimi të marrë formën e prerë atëherë do të heqë dorë. Unë do të vetëflijohem, nuk do të dal nga banesa. Kam punuar për këta fëmijë, por nuk mund ti shoh në rrugë. Kam nënën 90-vjeçe dhe dy vajza, fëmijët i kam larguar nga këtu, pasi janë 15-vjeç’deklaroi ai.

Në banesën që preket nga projekti i Unazës së Madhe në Laprakë, kati i parë përdoret për biznes, ndërsa i dyti për banim. Familja ende qëndron në katin e dytë dhe nuk pranon të zbresë. Të pranishëm janë edhe deputetë të PD.

Punonjësit e IMT nisin prishjen e murit rrethues të banesës, ndërsa familja nuk pranon që të dalë nga ambientet duke qëndruar në katin e dytë.

Ashtu si në Shkozë edhe në Laprakë situata është tensionuar, pasi aktualisht njëri nga pronarët e banesave ka refuzuar urdhrin e policisë për të dalë nga godina. Ai është shprehur se vetëm dje ALUIZNI e kishte njoftuar se banesa nuk legalizohet dhe se duhet të dalë, por pronari i shtëpisë thotë se çështjen e ka dërguar në gjykatë dhe se nuk mund të kryhet asnjë veprim deri sa të flasë drejtësia. Banesa është ndërtuar në 1997, ndërsa është e pa legalizuar.

Familjarët e banesës që është planifikuar që të shembet janë ngjitur në katin e dytë duke mos lejuar që të shembet, ndërsa punonjësit e IMT kanë ndaluar punën për momentin.

Përveç zonës së ‘Astirit’ dhe Shkozës në kuadër projektit të Unazës së Madhe vijojnë shembjet e banesave edhe në Laprakë. Në ‘Astir’ dhe Shkozë banorët që kanë ndërtimet pa leje vijojnë protestën, pasi kërkojnë dëmshpërblim të plotë.

E ndërsa një pjesë e banorëve janë sërish në protestë në Shkozë, IMT vijon punën për të pastruar gërmadhat nga objektet e prishura në kuadër të Unazës së Madhe që do të ndërtohet. Në Shkozë ndodhen forca të shumta police për të shmangur incidentet, pasi banorët vijojnë protestën.

Banorë e Shkozës, ashtu sikur ata të 'Astirit', janë ngritur në protestë për projektin e Unazës së Madhe, duke akuzuar se nuk është zbatuar gjurma e vjetër në planifikimin e këtij projekti. Partia Demokratike publikoi një video nga protesta dhe kundërshtimi i banorëve ditën e sotme në Shkozë. Në video duket prania e forcave të policisë, gra dhe fëmijë, ndërsa dëgjohen banorët që e cilësojnë aksionin për shembjen e banesave si të paprecedentë. “Tmerr i vërtetë, është diçka flagrante, e paprecedentë” shprehen ata.