1 muaj agjërim,balerini tek të varfrit:
Kuptova si jetohet me barkun bosh

“Një muaj agjërim dhe arrita të kuptoj se sa e vështirë dhe sakrifikuese është të jetosh me barkun bosh”, është ky rrëfimi i balerinit Erald Zela.
 
Eraldi ka zgjedhur që në këtë ditë feste të jetë më pranë atyre që rrethanat i kanë detyruar të vuajnë varfërinë në çdo ditë të jetës së tyre.
 
Balerini i Teatrit Kombëtar të Operës dhe Baletit në përfundim të agjërimit 1 mujor, me ushqime në duar, ka nxituar të shkojë të japë kontributin e tij në ndihmë të njerëzve në nevojë.
 
Për Shqiptarja.com ai  tregon se kjo është një nismë individuale të cilën e ka përsëritur edhe herë të tjera, megjithatë tashmë pas Ramazanit të parë që ka mbajtur është më i vetëdijshëm mbi vuajtjet e atyre që u mungon ushqimi.
 
Mes të nxehtit dhe provave të pandërprera, Eraldi nuk është lëkundur për asnjë moment në agjërimin e tij.
 
“E kam mbajtur gjatë gjithë kohës ku kemi qenë me prova në Tiranë dhe jashtë saj. 3 ditë kemi qëndruar në Korçë ku u përurua teatri dhe për asnjë moment nuk e kam ndërprerë”, shprehet ai.
 
Një gjest që jep shpresë dhe fal sadopak buzëqeshje për ata që falë Eraldit gëzuan në këtë ditë feste.







Redaksia Online
Al.N/Shqiptarja.com