18-vjeçarja e zhdukur ndjek LIVE 'Pa Gjurmë', mesazh babait: Na more fytyrën! Dëshmia: Punon në lokal tallava në Durrës /FOTOT Ekskluzive

TIRANË - Prej 21 tetorit 2019, Rozaldina Nasufi, 18 vjeç rezulton e zhdukur, ndërsa familja e saj nga Shkodra kërkon ndihmë në emisionin "Pa Gjurmë" në Report Tv. Paraditen e sotme vajza i ka dërguar disa mesazhe zanore në Facebook babait të saj nga një profil i rremë me emrin "Endri", ku i ka thënë se ndodhet në Durrës dhe se ka frikë të kthehet në familje. Ndërkohë një dëshmi e fortë të çon sërish drejt këtij qyteti, ku një i ri pretendon se e ka parë 18-vjeçaren në një lokal nate në qytetin bregdetar, madje ka nisur edhe fotot ekskluzive për emisionin "Pa Gjurmë". Moderatorja Odeta Dume i prezantoi fotot e vajzës, e cila ka ngjashmëri me Rozaldinën që është larguar nga banesa, fakt ky i konfirmuar edhe nga babai i saj. (Fotot janë nga larg dhe vajza duket ndryshe për shkak të make-up)

Fotot e mbërritura në redaksinë investigative të "Pa Gjurmë" të vajzës që dyshohet të jetë Rozaldina Nasufi

Babai thotë se e ka falur dhe do të dijë vendin se ku ajo ndodhet për tu siguruar se e reja po qëndron me dëshirë dhe jo e detyruar nga persona të tjerë.

"Vajza më ka thënë që ndodhet në Durrës, por se ku ekzaktësisht jo. Nuk e di përse nuk më kontakton. Nuk i di arsyet e saj. Nuk është se unë i kam keqtrajtuar apo e kam nxjerrë të punojë, unë i kam siguruar të gjitha vet", tha ai në një lidhje të drejtpërdrejtë nga qyteti i Shkodrës ku tha se do t'i drejtohet policisë për të bërë denoncimin për vajzën, me dyshimet se mund të jetë rrëmbyer. 

Babai ngre dyshime se vajza e tij mund të jetë në kushtet e presionit nga persona të tjerë për të thënë se është mirë. Ai kërkon të mësojë vendndodhjen e vajzës 18- vjeçare për ta parë me sytë e tij se ajo është mirë dhe se personat rreth saj nuk po e shfrytëzojnë.  Babai tha se vajza e ka ndjekur LIVE emisionin Pa Gjurmë me moderatoren Odeta Dume, dhe aty i ka dërgua një mesazh zanor në rrjetin social babait: "Hiqi ato foto se na more fytyrën, është turp për ne se po dëgjojnë edhe vjerria", citoi babai fjalët që i ka thënë e bija.

Babai tregon më tej një tjetër mesazh që vajza i ka dërguar dhe që e bën të shtojë edhe më shumë dyshimet se ajo nuk po qëndron larg shtëpisë me dëshirën e saj. "Hajde vetëm ti e mami, mos hajde me persona të tjerë. I kam kërkuar të më thotë adresën, por nuk më ka kthyer ende përgjigje", tha babai.

Po ditën e sotme, në emisionin "Pa Gjurmë" erdhi një dëshmi e një personi, i cili thotë se nga fotot e transmetuara në emision, ka dyshime se Rozaldina ndodhet në Durrës dhe punon në disa lokale nate. Vajza është prezantuar me një emër tjetër - tha dëshmitari - por ka shumë dyshime të jetë 18-vjeçarja nga Shkodra. 

"Në Durrës më duket se punon në tallava. Jam i bindur me 1 milion përqind. Të vij një familjar ta coj unë nëpër tallava. Kam dëgjuar se këto rrijnë një grup shoqesh. Diku e kam pikasur, se kaloj shumë në tallava. Jam i bindur me 1 milion përqind", tha dëshmitari. Një tjetër informacion i ardhur gjatë transmetimit LIVE e përforcoi këtë dyshim, pasi thanë se një grup vajzash nga Shkodra punojnë në lokale nate në zonën e Maminasit.

Babai i saj në emisionin e një dite më parë, tha se dy ditë pasi u zhduk një mesazh i erdhi nga një profil i rremë, ku pretendohej se ishte 18-vjeçarja: ''Babë, ata kanë frikë se mos lajmëro policinë''. Po ashtu nga kjo adresë i kanë shkruar: "Më lini pak kohë se vajza është mirë dhe ne do të komunikojmë, ju lutem mos i bërtisni".  

Babai ngriti fillimisht dyshime se vajza mund të ishte në Dubai, pasi vajza e tij ka qenë e fejuar në atë shtet, për tre muaj me një person të huaj. Rozaldina kishte udhëtuar dy herë në Dubai për të takuar të fejuarin e saj me shtetësi të huaj, por lidhja e tyre u ndërpre pasi siç tha babai i saj, familja e të fejuarit i kërkoi të vishej me ferexhe.

Rozaldina Nasufi doli nga shtëpia e saj 8 anëtarëshe, pasi i kërkoi para babait për të shkuar tek marketi i lagjes për të blerë një pije. Familjarët dyshojnë se vajza e tyre mund të jetë rrëmbyer për arsye trafikimi. Babai i saj tregoi se ditën kur Rozaldina u largua kishte veshur një palë atlete ngjyrë ari, një palë xhince të zeza, një bluzë të bardhë dhe një xhaketë ngjyrë kafe.

Për gjetjen e kësaj 18-vjecare, ju mund të na kontaktoni në të gjitha format tona të kontaktit:

2 numrat tanë të kontaktit:

Në cel: 069 99 55 698 si dhe në aplikacionet: WhatsApp dhe Viber

Në tel: 0444 17 778

Në adresën tonë në facebook: Pa Gjurmë Report TV

G.M./Shqiptarja.com

TAG:
• odeta dume
• Pa Gjurme
• Rozaldina Nasufi