Një i ri me origjinë shqiptare është shpallur fitues i konkursit prestigjioz italian “Pizza: Generazione Futuro”, një garë që promovon talentet e reja të artit të picës në Itali.

Emanuele Muhaxhiri, 24 vjeç, i lindur në Velletri pranë Romës nga prindër shqiptarë, fitoi vendin e parë me krijimin e tij të quajtur “Super Marinara”, gjatë finales së zhvilluar në provincën e Kazertës.

“Doja të përfaqësoja një ide të thjeshtë dhe ta shndërroja në diçka komplekse, edhe duke përdorur përbërës elementarë. Përbërësi më i rëndësishëm është pasioni që më kanë transmetuar prindërit e mi me origjinë shqiptare”, u shpreh Muhaxhiri pas fitores.

Falë këtij suksesi, ai do të marrë edhe çmimin special “Giovane dell’Anno 2026 – Ferrarelle Award”, një vlerësim i dhënë nga guida prestigjioze italiane 50 Top Pizza Italia 2026, gjatë ceremonisë që do të zhvillohet në korrik në Milano.

Muhaxhiri menaxhon së bashku me vëllain e tij një piceri në Velletri, pranë Romës. Në garë ai u paraqit me “Super Marinara”, një picë e frymëzuar nga tradita romane, ku protagonistë ishin hudhra, domatet dhe kaperët. Me këtë kombinim të thjeshtë, por të ekuilibruar, 24-vjeçari arriti të bindë jurinë dhe të lërë pas konkurrentët e tjerë.

Juristët vlerësuan jo vetëm shijen dhe paraqitjen e picës, por edhe teknikën dhe kreativitetin e Muhaxhirit, duke e shpallur fitues të edicionit të parë të konkursit.

Suksesi i tij është një tjetër histori e bukur e një të riu me origjinë shqiptare që po spikat në Itali, këtë herë në një nga konkurset më prestigjioze të artit të picës.