'Crossbones' ndez Bunk'Art, muzikë
elektrizuese në natën e parë|FOTO-VD

Ja një “shpërthim” muzikor brenda bunkerit anti-bërthamor në Tiranë...! “Crossbones” një nga grupet më të njohura të Rock-ut e mbajti premtimin.
 
E ka tundur BUNKArt1 nga themelet me muzikë mbrëmjen e së enjtes, duke çelur ditën e parë të festivalit të BUNK’Rock
 
Ishim me fat ata që e shijuan dhe u bashkuan me ritmin e muzikës. Ne thellësinë pesëkatëshe të muzeut Bunk’ART1 tingujt janë përcjellë me oshtima magjike.
 
Olsi Ballta, vokalisti dhe themeluesi i grupit, Theo Napoloni në bateri, Ben Turku në kitarë dhe Klejd Guza në bas kanë zbuluar për publikun albumin pjesë nga albumi i tyre më i fundit WWIII, Lufta e Tretë Botërore, që pritet të promovohet në janar.
 
Të lidhur emocionalisht me skenën e ish-sallës së Kuvendit dhe konceptin e muzeut, djemtë janë përfshirë në kënaqësinë e interpretimit live.
 
Janë dy dekada karriere e dashurie për muzikën rock te grupit Crosbones dhe është e natyrshme të shijosh këto emocione.
 
Pjesë e kësaj mbrëmjeje ka qenë edhe këngëtarja 18-vjeçare Lori Miho e cila me timbrin ritmik dhe ngjyrat e ngrohta të zërit të saj ka krijuar një atmosferë të veçantë.
 
Me ritme të ndezura Festivali i muzikës Bunk’Rock do të vijojë edhe me tre mbrëmje të tjera me performancat live ne sallën e Kuvendit në BUNK'ART 1 pranë Teleferikut në datat 13 janar, 20 janar dhe 27 janar.

[gallery]20252[/gallery]
(Fotot Antonio Çakshiri)

TAG:
• bunkart