Antikushtetues e quan Sali Berisha aktin normativ, përmes së cilit qeveria alokoi 4 mln euro për mbarëvajtjen e koncertit të reperit amerikan Kanye West. Kreu i PD tha se Rama ndau fondin e emergjencave me këngëtarin amerikan, vetëm për lobingje të tij.

“Në mënyrë të papritur, antikushtetuese, absolutisht antikushtetuese, Edi Rama merr nga fondi rezervë i qeverisë, krijimi i të cilit bazohet në nene të qarta të Kushtetutës së Shqipërisë, dhe ky fond që i është besuar atij për ta përdorur për emergjence, urgjenca dhe raste tepër të veçantë, këtë fond Edi Rama e ndan me Kanye West, një këngëtar i mirënjohur, vetëm e vetëm për lobingje të tij. Ky është një krim antikushtetues.

Në asnjë rrethanë dhe asnjë rast, një koncerti privat nuk mund t’i jepeshin paratë e emergjencave të një vendi apo paratë e rezervës së Këshillit të Ministrave. Këtë e bën vetëm ai që nuk pyet për Kushtetutë. Vetëm ai që nuk ka asnjë interes të shtetit ligjor apo interes kombëtar. Ka vetëm interesa personale. Me një grusht servilësh të inkriminuar ministra, të cilët nuk duhet të pranonin kurrë të bëheshin bashkëautorë në këtë krim”, tha Berisha.

Sipas Berishës, kjo pagesë është njoftim për shqiptarët dhe protestuesit.

“Ftoj qytetarët të bashkohen në një protestë të fuqishme tërësisht ndaj akteve të përsëritura të Edi Ramës dhe qeverisë së tij. Pagesa 4 mln për Kanye West është një injorim i tmerrshëm për shqiptarët dhe ata qindra mijëra qytetarë që janë në protestë kundër tij. Kjo është dëshmi se si Rama taksat e shqiptarëve i konsideron si para të portofolit apo llogarive të tij. Qeveria shqiptare do i paguajë kompanisë 10 mln euro bileta të munguara që do ndahen mes Edi Ramës dhe sojës së tij”, tha Berisha.

Lajmi në përditësim....

Rendit zhvillimet sipas orarit:
Ora 13:07
Kur do vish në Amerikë? Berisha ‘ngec’ para qytetarit: Shpresoj në vjeshtë...nëse do ketë aktivitete

Një muaji pasi u bë publik njoftimi i DASH për Sali Berishën, se u përjashtua nga ndalimi për të hyrë në SHBA, kreu i PD ende nuk e ka një datë se kur do të shkelë në Amerikë. Një qytetar e pyeti gjatë bashkëbisedimit në rrjetet sociale se kur do të shkojë në SHBA, por Sali Berisha ende po shpreson për një ftesë, të paktën në shtator.

“Do vi në Amerikë shpresoj nga vjeshta, po të ketë aktivitet ndërkombëtar, ose kombëtar. Do vi me kënaqësi të madhe”, tha Berisha.

Vetë Berisha nuk thotë që ia kanë hequr non gratën, por se ai dhe familja e tij tashmë mund të udhëtojnë drejt Uashingtonit. Më herët, kryedemokrati e ka pranuar se rikthimi i vizës ka ardhur si pasojë e një lobimi në SHBA, i paguar sipas tij nga një fondacion, por që ende nuk e ka zbuluar shifrën.

Me argumentet se është i korruptuar dhe minues i demokracisë, më 19 maj 2021, Shtetet e Bashkuara të Amerikës e shpallën Sali Berishën “non grata”, së bashku me familjen e tij të ngushtë, bashkëshorten dhe 2 fëmijët, Liri Berishës, Shkëlzen Berishës dhe Argita Berisha Malltezit. 

SI.E./Shqiptarja.com

Ora 12:58
1.5 mld euro për ‘Rilindjen Urbane 2.0’, Berisha: Fond i caktuar për zgjedhjet lokale, Rama do i vjedhë bashkë me kryebashkikakët

Kreu i PD, Sali Berisha pretendon se Edi Rama po përgatitet që tani për vjedhjen e zgjedhjeve lokale të 2027-ës. Në një komunikim me qytetarët në rrjetet sociale, Berisha tha se 1.5 mld eurot që do të shkojnë për programin “Rilindja Urbane 2.0” janë fond ii caktuar për zgjedhjet, që sipas tij do të vidhet nga Rama në bashkëpunim me kryebashkiakët.

"Është fondi që ka caktuar për zgjedhjet elektorale. Fond që do ta vjedhë bashkë me kryebashkiakët. Akt i shëmtuar në prag të fushatës elektorale”, tha Berisha.

SI.E./Shqiptarja.com