Gjykata vendos: Dhe 2 muaj burg për "baronin" e drogës Çela

(10/1/2002) TIRANE Gjykata e Tiranës shtyn edhe për 2 muaj afatet e para-burgimit për Gëzim Çelën. Dje, gjyqtarja Miranda Ndoja, ka pranuar kërkesën për të shtyrë afatin njëvjeçar të para-burgimit për shqiptarin e akuzuar nga drejtësia italiane. I arrestuar më 6 janar të një viti më parë, i ashtuquajturi baroni i drogës, mbushte një vit burg duke pritur gjykimin. Vetëm disa ditë më parë prokurori i çështjes Eneid Nakuçi i kërkoi gjykatës zgjatjen e afatit hetimor edhe për dy muaj. Brenda 60 ditësh prokuroria e Triestes duhet t'i dorëzojë homologëve të tyre shqiptar provat që plotësojnë dosjen që vërteton akuzën për "trafik prostitucioni" të Gëzim Çelës. Në fillim mbi të riun nga Fushë Kuqja e Krujës rënduan një sërë veprash të rënda penale si " trafik droge", "shfrytëzim prostitucioni", " favorizim të trafikut të klandestinëve", " vrasje" etj. Emri i këtij njeriu lidhet dhe me ekzekutimin e tre karabinierëve në Udine të Italisë. Vrasje të cilat kanë ndodhur 4 vite më parë, në 1998. Ndërsa tani Gëzim Çela pret në qeli gjykimin vetëm për një akuzë. Prokuroria arriti të provonte vetëm akuzën e " shfrytëzim prostitucionit". Çela nuk mund të ekstradohet përtej Adriatikut, ku akuzohet se ka kryer veprat penale, për shkak të mos pasjes së një marrëveshjeje ekstradimi me Italinë. Por Gëzim Çela do të gjykohet në gjykatën shqiptare dhe prokuroria italiane do të përfaqësohet nga homologët shqiptar. Burime nga Prokuroria e Përgjithshme bëjnë të ditur se rreth 50 prostituta shqiptare, rumune dhe bullgare kanë dëshmuar në Itali në lidhje me aktivitetin e bandës së kryesuar nga Gëzim Çela. Dosja me prova që prokurorët e shtetit fqinjë dorëzuan në Prokurorinë e Përgjithshme menjëherë pas arrestimit të Çelës, mbante edhe emra të disa shqiptarëve të tjerë, të cilët akuzohen se bënin pjesë në këtë organizatë. Në verën e vitit të kaluar Policia Shqiptare u vu në aksion dhe arrestoi vëllezërit e Gëzim Çelës, Adem dhe Elez Çelën, Përparim Ismailin dhe Gëzim Gjinin, të gjithë nga Fushë Kuqja e Krujës. Prokuroria i akuzoi si pjesëtar të bandës së kryesuar nga Gëzim Çela. Por 3 nga 4 të arrestuarit e rinj lirohen pas 30 ditësh. Prokuroria shqiptare nuk arrin të vërtetojë akuzën si bashkëpunëtorë të Gëzim Çelës, brenda këtij afati kohor të vendosur nga Gjykata e Tiranës. Ndërsa mbet në burg vetëm Gëzim Gjini, të cilin prokuroria e akuzon si një nga bashkëpunëtorët kryesor të të riut nga Fushë Kuqja.

//Shqiptarja.com