Akuzat e Ramës, reagon Rektori i UT, Mynyr Koni: Kryeministri tregon frikë, mbështes protestat e studentëve

Rektori i Universitetit të Tiranës, Mynyr Koni mbështet protestat e studentëve. Përmes një deklarate të shpërndarë për mediat ai ka reaguar lidhur me akuzat e djeshme të kryeministrit Edi Rama nga mbledhja me rektorët dhe dekanët, për protestën e studentëve dhe shqetësimet e ngritura nga ata lidhur me problematikën e Arsimit të Lartë. Rama bëri me faj pikërisht rektorët dhe dekanët për situatën si pasojë e abuzimeve me administrimin e fondeve.

Sipas tij, rektorë dhe dekanë se kanë bërë shpenzime marramendëse për roje sigurie dhe për mobilime zyrash, ndërkohë që nuk ka lënë një qindarkë për kërkimet shkencore, ndërsa paralajmëroi rishikim të autonomisë universitare nga qeveria (Lexo këtu). Por në reagimin e tij, rektori i UT, Mynyr Koni thotë se kryeministrin Edi Rama është përpjekur ditën e djeshme që të gjejë fajtorë pa faj në radhët e rektorëve dhe dekanëve. 

Sipas Konit, akuzat e shefit të qeverisë tregojnë se ai nuk e njeh Ligjin e Arsimit të Lartë, ndërsa shtoi se akuzat e tij tregojnë frikë. Duke thyer heshtjen 10-ditore për protestën e studentëve, sot Koni e quan atë si një shuplakë për qeverinë dhe shprehje të demokracisë, ndërsa pozicionohet në mbështetje të saj. 

DEKLARATA E PLOTË
Të nderuar kolegë,
Studentë të Universitetit të Tiranës,
I detyruar nga akuzat tepër të rënda dhe sjellja e Kryeministrit ndaj personit tim në takimin e ditës së enjte, datë 13 Dhjetor 2018, të mbajtur me autoritetet drejtuese të fakulteteve dhe universiteteve publike ne vend, ju bëj me dije se; Në fakt është shumë e kuptueshme arsyeja dhe qëllimi i gjithë çfarë është bërë gjatë këtyre ditëve në adresën time dhe që në fakt ka filluar shumë kohë më parë. Këtë e kam ndjerë dhe e kam kuptuar shumë qartë.

Të mundohesh të ndryshosh rrjedhën e gjërave, të mundohesh të gjesh dhe të bësh “fajtor” pa faj, nuk është gjë tjetër veçse një përpjekje e dështuar që tregon vetëm frikë dhe asgjë tjetër.

Zoti Kryeministër,
Në asnjë ditë të punës time si Rektor i Universitetit të Tiranës nuk jam “arratisur” nga përgjegjësia, por përkundrazi. Në mënyrë të vazhdueshme, kam paraqitur problematikat (që Ju vetëm tani po i pranoni se eksiztojnë) në të gjitha institucionet e Shtetit Shqiptar, përfshirë edhe Ju.

Akuzat që ju bëni, tregojnë shumë qartë se Ju nuk e njihni ligjin e arsimit të lartë 80/2015. Të njëjtën gjë bëni edhe me çështjen e tarifës së provimeve të mbartuara të studentëve, për të cilën, Senati Akademik i UT, ka deklaruar se nuk ka bërë asnjë kërkesë për vendosjen e saj.

Në çdo rast, Ju ushtroni presion, intimidoni, ironizoni dhe shantazhoni, jo vetëm në mënyrë të drejtëpërdrejtë por edhe nëpërmjet mediave që janë pranë qeverisë, duke mos i dhënë mundësinë askujt, në rastin konkret mua, të shprehem dhe të them të vërtetën se çfarë realisht po ndodh në Universitetin e Tiranës.

Është e vërtetë që në Universitetin e Tiranës, ka patur probleme të brendshme, të inskenuara nga kasta drejtuese e vjetër e universitetit, për qëllime të caktuara, që fatkeqësisht kanë gjetur mbështetjen nga institucionet më të larta të Shtetit Shqiptar. Në Universitetin e Tiranës në asnjë rast nuk ka patur bllokim, sikurse mundoheni ta paraqesni Ju, në mënyrë që të justifikoni dhe të shtrembëroni arsyet e vërteta të protestës së studentëve.

Ju po deklaroni sot, se duhet të shkarkohen anëtarët e Bordit të Administrimit, kurse unë, në mënyrë të vazhdueshme i kam kërkuar Ministres së Arsimit, Sportit dhe Rinisë të marrë masat e nevojshme për çfarë Ju keni konstatuar sot, si një dështim të funksionimit edhe të Bordit të Aministrimit të Universitetit të Tiranës.

Bordi i Administrimit të Universitetit të Tiranës, nëpërmjet Administratorit të UT (aktivist në fushatat elektorale të Partisë tuaj), është përpjekur sistematikisht të pengojë zhvillimin normal të punës.

Në fakt arsyeja që unë luftohem është pikërisht njohja shumë e mirë e ligjit të arsimit të lartë, dhe jo vetëm, është përgjegjshmëria e lartë dhe përkushtimi në punë që më karakterizon, dhe mosbërja palë në interesa të caktuara.

Të nderuar kolegë dhe studentë të UT, Ju siguroj se në çdo ditë të punës time si Rektor i Universitetit të Tiranës, do të vazhdoj të udhëhiqem nga morali dhe integriteti i lartë personal dhe profesional dhe nuk do t’i gjunjëzohem askujt dhe për asnjë arsye, sikurse kam vepruar deri më sot. Nëse për Kryeministrin dhe qeverinë që ai drejton, protesta e studentëve ështe një shuplakë, për mua është një shprehje e lirisë dhe demokracisë, dhe si e tillë është një fitore.

Nga ana tjetër, pretendimet e kryeministrit Edi Rama faktohen edhe nga një raport-auditi i Ministrisë së Arsimit për shkeljet në Universitetin e Tiranës (Lexo këtu). Më 21 shkurt 2018 Ministria e Arsimit, Sporteve dhe Rinisë urdhëroi nisjen e auditit në Universitetin Publik të Tiranës, që drejtohej nga Koni. Një grup prej 5 ekspertësh financiarë dhe juristë shkuan si përfaqësues të ministrisë në Universitet për të kryer verikime për procedurat e administrimit akademik dhe finnanciar të UT-së.

Auditi erdhi pas skandalit të mungesës së fondeve për të paguar rrogat e pedagogëve, që shkaktoi një stuhi të madhe mediatike dhe akuza të stafeve akademike ndaj qeverisë se po linte pa bukë pedagogët. Procesi i verifikimit që zgjati 10 ditë u pasua nga një raport përfundimtar prej 36 faqesh ku viheshin në pah gjetjet kryesore: shkeljet juridike dhe abuzimet e mëdha financiare nga rektori Mynyr Koni dhe të dekanëve të fakulteteve të Tiranës.

//Shqiptarja.com

TAG:
• edi rama
• mynyr koni
• protesta e studentëve